लाच मागितल्याप्रकरणी अभियंत्याविरुद्ध गुन्हा, हवे होते ४० हजार

लातूर : चाळीस हजारांची लाच (Bribe) मागितल्याप्रकरणी अभियंता ज्ञानदेव प्रल्हादराव गुडे यांच्याविरूद्ध गुन्हा दाखल झाला आहे. लाचलुचपत प्रतिबंधक विभागाने (Anti Corruption Bureau) गुरुवारी (ता.२९) ही कारवाई केली. गुडे हे जिल्हा परिषदेच्या (Latur Zilla Parishad) यांत्रिकी उपविभागात शाखा अभियंता आहेत. याबाबत लाचलुचपत प्रतिबंधक विभागाचे पोलिस उपअधीक्षक माणिक बेद्रे यांनी सांगितले, की तक्रारदाराच्या गावातील जुन्या पाच विंधनविहिरींवर वीजपंप बसवण्यात आले. या कामासाठी सात लाख ४० हजार रुपये खर्च झाला. या कामाची एमबी तयार करून बिल मंजूर करण्यासाठी शाखा अभियंता गुडे यांनी तक्रारदाराकडे साठ ते ६५ हजार रुपये लाचेची मागणी केली. या संदर्भात तक्रारदाराने २७ जुलैला लाचलुचपत प्रतिबंधक विभागाशी संपर्क साधला. या विभागाच्या पथकाने याच दिवशी लाच मागणीची पडताळणी केली. (anti corruption burau nabbed latur zilla parishad engineer glp88)

त्यावेळी गुडे यांनी लाच मागितल्याचे, तडजोडीअंती चाळीस हजार रुपयांची मागणी केल्याचे निष्पन्न झाले. त्यानंतर पथकाने सापळा लावला. तक्रारदार लाचेची रक्कम देण्यासाठी जिल्हा परिषदेच्या यांत्रिकी उपविभागात गेले असता गुडे यांनी लाच घेण्याचे जाणूनबुजून टाळले. लाच मागितल्या प्रकरणी गुडे यांच्याविरोधात शिवाजीनगर पोलिस ठाण्यात गुन्हा दाखल केला. पोलिस उपअधिक्षक बेद्रे, निरीक्षक कुमार दराडे, निरीक्षक बाबासाहेब काकडे व त्यांच्या सहकाऱ्यांनी या कारवाईत सहभाग घेतला.