राख्यांच्या दरात सुमारे ४० टक्के वाढ

औरंगाबाद - दोन दिवसांवर येऊन ठेपलेल्या रक्षाबंधनानिमित्त बाजारपेठेत आकर्षक राख्या विक्रीसाठी दाखल झाल्या आहेत. बहीण-भावाच्या पवित्र नात्याचे प्रतीक असलेला रक्षाबंधन सण गुरुवारी (ता. ११) साजरा होणार असून बाजारातील आकर्षक राख्या बहिणींना भुरळ घालत आहेत. महागाईमुळे राख्यांच्या दरात सुमारे ४० टक्के दरवाढ झाल्याचे व्यावसायिकांनी सांगितले.

बाजारात विविध प्रकारच्या आकर्षक राख्यांसह पारंपरिक गोंडा राखी विक्रीस दाखल झाली आहे. कुंदन वर्क आणि रेशमी धाग्यातील साध्या राख्यांना विशेष पसंती आहे. भावाच्या नावाच्या राख्या, चांदी आणि सोन्यामधील राख्यांनाही मागणी वाढत आहे. शहराच्या गुलमंडी, राजाबाजार, औरंगपुरा, गजानन मंदिर, शिवाजी नगर, पुंडलिक नगर, टिव्ही सेंटर, सिडको अशा विविध भागांमध्ये लहान-मोठ्या राखी विक्रीची दुकाने सजल्याचे दिसत आहेत.

कामानिमित्त परदेश तसेच शहराबाहेर असलेल्या भाऊरायांना साध्या राख्यांना विशेष पसंती असून भावाच्या नावाच्या राख्या, चांदी आणि सोन्यामधील राख्यांनाही मागणी आहे, सणाकरिता बाजारात चिमुकल्यांसाठी लायटिंग राख्या, छोटा भीम, डोरेमॉन, मोटू पतलू, श्रीगणेशा, श्रीकृष्ण अशा राख्या बाजारात विक्रीस आल्या आहे. लायटिंग, लाकडी, पपेट, कडा राखीसह पारंपरिक गोंडा राखी अशा विविध प्रकारच्या राख्या बाजारात विक्रीस आल्या आहेत.

फेसबुक, ट्विटर राख्यांनी वेधले लक्ष

नव्या प्रकारात डोरेमॉन, छोटा भीम, कृष्णा तर लायटिंग राखीमध्ये स्पिनर लायटिंग राखी, कपल राखी विशेष लोकप्रिय ठरत आहे. लायटिंग राखीमध्ये बटन दाबले की, विविध रंगीत लायटिंगमुळे आकर्षकता वाढते. तर पहिल्यांदाच बाजारात व्हॉट्सअप, फेसबुक, ट्विटर राख्यांनी लक्ष वेधले आहे.