Aurangabad Crime: दुकान फोडून दागिन्यांसह २० लाखांचा ऐवज लंपास

Aurangabad Crime News : दुकान बंद करून कार्यक्रमासाठी भावाकडे गेलेल्या महिलेच्या दुकानातील रोख रकमेसह सोन्याचे दागिने व किमती साड्या असा जवळजवळ १८ ते २० लाख रुपयांचा ऐवज चोरट्यांनी चोरून नेला.

विशेष म्हणजे चोरट्यांनी सीसीटीव्ही कॅमेरे फिरवून डीव्हीआरसुद्धा लंपास केला. ही चोरीची घटना मंगळवारी (ता.१४) सकाळी उघडकीस आली.

अरविंद भगवंता यादव (रा.साईसंकेत पार्क गट १०६, रो हाऊस नं ३३, बीड बायपास) यांचे साजापूर गट नंबर ४१ मधील प्लॉट क्रमांक ५२ येथे श्री महालक्ष्मी कलेक्शन नावाचे कपड्याचे दुकान आहे. यादव यांच्या मुलीचे ३० मेरोजी लग्न आहे. त्यापूर्वी २७ फेब्रुवारीरोजी साखरपुडा असल्याने लग्नाचा बस्ता खरेदी करून त्यांनी दुकानात ठेवला होता.

विशेष म्हणजे लग्नाच्या बस्त्यासाठी त्यांनी रक्कमही जमा केली होती. मात्र, बस्ता बांधताना वराकडील मंडळींनी पैसे भरले. त्यामुळे त्यांच्याकडील पैसे तसेच होते.

अरविंद यादव यांच्या पत्नी संगीता यांच्या भावाच्या घरी कार्यक्रम असल्याने रोख रक्कम व लग्नाचा बस्ता दुकानात ठेवून संगीता व अरविंद यादव सोमवारी (ता.१३) सायंकाळी साडेचारच्या सुमारास कार्यक्रमासाठी सिडको वाळूज महानगर येथे गेल्या होत्या.

त्यानंतर रात्री उशिर झाल्यामुळे तशाच बीड बायपास येथील राहत्या घरी गेल्या. सकाळी ते दुकानात आले असता ही चोरी झाल्याचे लक्षात आले.

चोरीबाबत यादव यांनी सांगितले, की चोरट्यांनी शिडी लावून घराच्या वरच्या खिडकीतून आत प्रवेश केला. त्यानंतर जिन्यातून खाली उतरून आतून कडी उघडून दुकानातील ऐवज लंपास केला.

यात रोख अंदाजे सव्वासहा लाख रुपये, पाच ग्रॅमच्या दोन अंगठ्या व २२ ग्रॅमचे झुमके तसेच पैठणी साड्या असा जवळजवळ १८ ते २० लाख रुपयाचा ऐवज लंपास केला. माहिती मिळताच वाळूज एमआयडीसी पोलिस आणि घटनास्थळी धाव घेत पाहणी केली.

श्‍वान पथकालाही पाचारण करण्यात आले. मात्र, माग निघू शकला नाही. चोरीची नोंद वाळूज एमआयडीसी पोलिस ठाण्यात करण्यात आली.