राज्यात दुचाकी चोरणारी टोळी पकडली, तब्बल २३ दुचाकींसह साडेआठ लाखांचा ऐवज जप्त

औरंगाबाद : राज्यभरात धुमाकूळ घालणाऱ्या दुचाकी चोरणाऱ्या टोळीच्या स्थानिक गुन्हे शाखेने अखेर मुसक्या आवळल्या. या टोळीतील संशयित आरोपी हे औरंगाबादसह जळगाव, नाशिक, बुलडाणा व जालना जिल्ह्यांत दुचाकी चोरी करून फायनान्स कंपनीच्या असल्याचे सांगत विक्री करत असल्याचे समोर आले आहे. टोळीतील सहा जणांकडून तब्बल २३ दुचाक्या जप्त करण्यात आल्या आहेत.

हे आहेत आरोपी
शेखर ऊर्फ आण्णा प्रकाश दांडगे (२६, रा.रेणुकाई पिंपळगाव ता. भोकरदन जि. जालना, ह.मु. वडगाव कोल्हाटी), विलास रामभाऊ कुऱ्हाडे (२४, रा. हिसोडा ता. भोकरदन जि. जालना) यांनी साथीदार श्रीराम ऊर्फ बंडू शैलेंद्रसिंग जोनवाल (रा. लिहा पारध ता. भोकरदन जि. जालना), तेजराव ऊर्फ बाबा रामदास जाधव (रा. पिंपळगाव रेणुकाई ता. भोकरदन जि. जालना), ज्ञानेश्वर ऊर्फ नाना रामदास पवार (रा. मासरूळ ता.जि.बुलडाणा), गजानन फकीरचंद गोठवाल (रा. जळगाव सपकाळ ता. भोकरदन जि. जालना) अशी अटकेतील सहा दुचाकी चोरांनी नावे आहेत.

असा लागला छडा
रेकॉर्डवरील गुन्हेगारांच्या शोध घेत असलेल्या स्थानिक गुन्हे शाखेच्या पथकाला माहिती मिळाली की, औरंगाबाद ग्रामीण भागात दुचाकी चोरीतील आरोपी शेखर ऊर्फ आण्णा प्रकाश दांडगे आणि विलास कुऱ्हाडे हे दोघे त्यांच्या मूळगावी भोकरदन तालुक्यातील रेणुकाई पिंपळगाव आणि हिसोडा येथे आले आहे. त्यांनी औरंगाबादसह जळगाव, नाशिक, बुलडाणा व जालना येथून मोठ्याप्रमाणात दुचाकी चोरी केल्या असून बँकेने ओढून आणलेल्या दुचाकी असून त्यांची कागदपत्रे नंतर आणून देतो अशा थापा मारून खेडयापाड्यातील लोकांना विक्री केल्या होत्या. खात्रीशीर माहितीवरून दांडगे आणि कुऱ्हाडे या दोघांना पोलिसांनी ताब्यात घेतले. चौकशीत दोघांनी अन्य चार साथीदारांच्या मदतीने जळगाव सपकाळ, ता. भोकरदन व मासरूळ ता.जि. बुलडाणा व अन्य ठिकाणच्या लोकांना दुचाकी विक्री केल्याचे सांगितले. पोलिसांनी या सहा जणांच्या ताब्यातून तब्बल २३ दुचाकी, ५ मोबाईल असा एकूण ८ लाख ४७ हजार ९०० रुपयांचा मुद्देमाल जप्त केला. ही कारवाई पोलिस अधीक्षक मोक्षदा पाटील यांच्या मार्गदर्शनाखाली उपनिरीक्षक संदीप सोळंके, जमादार बालू पाथ्रीकर, नामदेव शिरसाठ, श्रीमंत भालेराव, राहुल पगारे, संजय भोसले, बाळासाहेब नवले, संजय तांदळे, योगेश तरमाळे यांच्या पथकाने केली.

संपादन - गणेश पिटेकर