औरंगाबाद : शेतकऱ्यांची पूर्व हंगामी मिरचीला पसंती

चिंचोली लिंबाजी : परिसरात गेल्या वर्षी झालेल्या अतिवृष्टीने भूगर्भातील पाणीसाठा वाढल्याने यंदा येथील शेतकऱ्यांनी पूर्व हंगामी मिरचीला पसंती दिली असून रखरखत्या उन्हातही हे पीक तग धरून डौलाने उभे असल्याचे चित्र विविध शेतांमध्ये दिसून येत आहे.

चिंचोली लिंबाजीसह बरकतपूर, टाकळी अंतूर, लोहगाव, गणेशपूर, वाकी, नेवपूर, रेऊळगाव, करंजखेड तळनेर, घाटशेंद्रा, वाकद, शेलगाव आदि गावातून कमी अधिक क्षेत्रात मागील आठ दहा वर्षांपासून पूर्वहंगामी मिरची लागवड केली जाते. हळूहळू लागवडीचे क्षेत्र वाढत चालले असून यातून शेतकऱ्यांना खरीप पिकासाठी मोठा आर्थिक हातभार दरवर्षी लागत आहे. गेल्या वर्षी संपूर्ण परिसरात अतिवृष्टी झाली. यातून शेतकऱ्यांच्या पिकांचे अतोनात नुकसान झाले.

परंतु या पावसामुळे जमिनीतील पाणीपातळीत मोठी वाढ झाल्याने परिसरातील विहिरी तग धरून राहिल्याने याच कमी अधिक पाण्याच्या जोरावर परिसरातील शेतकऱ्यांनी यावर्षी शेतकऱ्यांनी ठिबक सिंचन व मल्चिंग पेपरचा मोठ्या प्रमाणात वापर करून मिरची लागवड केली आहे. दरवर्षी मिरची पिकास प्रारंभी दोन ते तीन मोठ्या तोडणीनंतर चांगला दर मिळतो. पुढे उत्पन्नात वाढ होऊन बाजारात मिरची जास्त प्रमाणात आवक सुरु झाल्यानंतर दर कोसळतात. परंतु पहिला एखाद्या दोन मिरचीच्या तोडी लवकर झाल्यास चांगला पैसा हाती येतो, अशी माहिती येथील शेतकऱ्यांनी दिली आहे.

पावसाचे आगमन लवकर झाल्यास पूर्व हंगामी मिरचीचे चांगले पीक येते.तर पाऊस लांबल्यास काही कमी पाण्याचे क्षेत्र संकटात सापडते अशावेळी मिरचीचे उत्पादन कमी होते, असे असले तरी सुरुवातीला चांगला दर मिळत असल्याने मोठा आर्थिक फायदा होण्यास मदत होते.

-ज्ञानेश्वर साळुंके, शेतकरी