औरंगाबाद : देवगिरी एक्सप्रेसवर दरोडा टाकणारे आरोपी कारागृहात

औरंगाबाद : पोटूळ स्‍टेशनवर थांबलेल्या देवगिरी एक्सप्रेसवर दगडफेक करून रेल्वेतील प्रवासी महिलेची अडीच लाख रुपये किंमतीची सोन साखळी लांबविल्याप्रकरणी आरोपी जावेद ऊर्फ निल्या तुळसीराम पवार (वय २४, रा. डोमेगाव ता. गंगापूर) यांची न्‍यायालयीन कोठडीत रवानगी करण्‍याचे आदेश प्रथम वर्ग न्‍यायदंडाधिकारी बी. एम. पोतदार यांनी सोमवारी दिले. आरोपी जावेद ऊर्फ निल्या पवार याला ११ मे रोजी पोलिसांनी अटक केली होती. तर १ मे रोजी आरोपी शिवानंद काळे याला अटक करण्‍यात आली होती.

आरोपींकडून चोरी गेलेल्या अडीच लाख रुपये किमतीची ३५ ग्रॅम वजनी सोन्याची साखळी पैकी २६ ग्रॅम सोनसाखळी जप्‍त करण्‍यात आली आहे. प्रकरणात लक्ष्‍मी नुने प्रभाकर (रा. करापुरकर चाळ, जेबी मार्ग एल्फीस्‍टन रोड मुंबई) यांनी फिर्याद दिली. त्यानुसार औरंगाबाद लोहमार्ग पोलिस ठाण्‍यात गुन्‍हा दाखल करण्‍यात आला. तपासा दरम्यान चोरीला गेलेली सोनसाखळी विक्री करण्‍यासाठी शिवानंद काळेसह तिची मुलगी ऐक्शन आणि चिवक वांग्या पवार असे तिघे

औरंगाबादेत आले होते.

त्यावेळी लोहमार्ग स्‍थानिक गुन्‍हे शाखेने आरोपी शिवानंद काळे याला अटक केली. गुन्‍ह्यात आरोपी शिवानंद काळे याचा भाऊ चिवा काळे आणि मुलगी ऐक्शन काळे यांच्‍यासह वांग्या पवार, निल्या पवार, किशोर कांताराज पवार व कबुतर राजू काळे यांचा देखील सहभाग असल्याचे स्‍पष्‍ट झाले आहे.