गावठी पिस्तुलासह पाच काडतुसे जप्त

पिशोर - पिशोर पोलिसांनी बुधवारी (ता.२२) एका तरुणाच्या ताब्यातून एक गावठी पिस्तूल व पाच जिवंत काडतुसे जप्त केली. याप्रकरणी तरुणासह त्याच्या प्रेयसीला ताब्यात घेण्यात आले. विनोद सरदार परदेशी (वय ३५, रा.जामडी ता.चाळीसगाव जि. जळगाव), या तरुणासह एक महिलेला पोलिसांनी ताब्यात घेतले.

याबाबत पोलिसांनी सांगितले की, एक कार (क्र.एम.एच-२० बीयएन-६०४४) चिंचोली लिंबाजीकडून नागदकडे वेगाने जात आहे आणि त्यात एका तरुणासह महिला असून तरुणाकडे पिस्तूल असल्याची माहिती पिशोर पोलिसांना मिळाली. मिळालेल्या माहितीनुसार सहायक पोलिस निरीक्षक कोमल शिंदे यांनी त्यांच्या कर्मचाऱ्यांसह सावरगाव फाटा येथे नाकाबंदी केली. या ठिकाणी सांगितलेल्या वर्णनाची एक कार (एम.एच-२० बी.एन- ६०४४) अडविण्यात आली. कारचालकाची झडती घेतली असता त्याच्याकडे विनापरवाना एक गावठी बनावटीचे पिस्तूल तसेच पाच जिवंत काडतुसे व एक मोबाईल आढळून आला. पोलिसांनी पंचनामा करून कार सह पिस्तूल, काडतुसे व मोबाईल असा एकूण २५५००० रुपयांचा मुद्देमाल जप्त केला.

यावेळी आरोपी विनोद सोबत कारमध्ये असलेल्या त्याच्या प्रेयसीचा सुद्धा या गुन्ह्यात सहभाग असल्याचे निष्पन्न झाल्याने आरोपी विनोद सह तिच्याविरुद्ध सुद्धा पिशोर पोलिस ठाण्यात गुन्हा दाखल करण्यात आला. पोलिस उपनिरीक्षक सतीश बढे अधिक तपास करत आहे. सहायक पोलिस निरीक्षक शिंदे, पोलिस नाईक सोपान डकले, लालचंद नागलोद, पोलिस अंमलदार संदीप चव्हाण, दीपक सोनवणे, अन्सार पटेल, करण म्हस्के, साईनाथ घुगे, कौतिक सपकाळ यांनी ही कारवाई केली.