हिंगोली: किराणा दुकानाला आग, कोट्यवधी रुपयांचे नुकसान

हिंगोली : शहरातील गणपती चौक परिसरात असलेल्या आर. के. ट्रेडिंग किराणा साहित्य विक्रीच्या दुकानाला गुरुवारी (ता.सात) मध्यरात्री आग लागली. यात जवळपास एक ते दीड कोटी रुपयांचे नुकसान झाले आहे. घटनास्थळी अग्निशमन दलाने चार ते पाच तासानंतर आगीवर नियंत्रण मिळविले तोपर्यंत दुकानातील साहित्य जळून खाक झाले होते. हिंगोली शहरातील गणपती चौक परिसरात राम अग्रवाल यांचे आर. के.ट्रेडिंग किराणा साहित्य विक्रीचे होलसेल दुकान आहे. गुरुवारी रात्री अग्रवाल हे दुकान बंद करून नेहमीप्रमाणे घरी गेले होते.

मध्यरात्री दुकानातून धूर निघू लागला त्यानंतर काही वेळातच दुकानातून आगीचे गोळे बाहेर पडत होते. या भागातील नागरिकांनी या घटनेची माहिती श्री. अग्रवाल यांच्यासह पोलीस व अग्निशमन दलाला दिली. तसेच नागरिक देखील येथे जमा झाले. घटनास्थळी पालिकेचे मुख्याधिकारी डॉ. अजय कुरवाडे यांच्यासह पोलीस पथक दाखल झाले. आग विझविण्यासाठी कळमनुरी , औंढा नागनाथ , वसमत येथील अग्निशामक दलास पाचारण करण्यात आले . तसेच शहरातील दोन खासगी टँकरद्वारे आगीवर पाणी ओतण्यास सुरुवात केली. शुक्रवारी ता.आठ सकाळी आग आटोक्यात आली मात्र तोपर्यंत दुकानातील सर्व किराणा साहित्य जळून खाक झाले होते. या आगीमध्ये सुमारे एक ते दीड कोटी रुपयांचे नुकसान झाल्याचा अंदाज अग्रवाल यांनी व्यक्त केला आहे. आगीचे नेमके कारण समजू शकले नाही. मात्र शॉर्टसर्किटमुळे आग लागली असावी अशी शक्यता व्यक्त केली जात आहे.