आडूळ परिसरात महावितरणचे अघोषित भारनियमन

आडूळ - परिसरात महावितरणने सुरु केलेल्या अघोषित भारनियमनामुळे शेतकरी राजा हैराण असून दुसरीकडे व्यापाऱ्यांनाही याचा फटका बसला असून सामान्य नागरिकांचाही भारनियमनामुळे चांगलाच घामटा निघत असल्यामुळे आडूळ परिसरात महावितरणविरुध्द नागरिकांनी रोष व्यक्त केला आहे. गेल्या काही दिवसांपासून आडूळ ३३ केव्ही उपकेंद्रा अंतर्गत येणाऱ्या प्रत्येक गावात अघोषित भारनियमन केले जात असल्याने शेतकऱ्यांची पिके पाण्या अभावी कोमेजून जात आहे तर वारंवार वीजपुरवठा खंडित होत असल्याने व्यापाऱ्यांची दुकाने दिवसातून अनेक तास बंद राहात आहे. यामुळे व्यापारी सध्या भारनियमनामुळे त्रस्त झाले आहेत.

सध्या कडक उन्हाळा जाणवत असल्याने उकाडा वाढून शरीराची लाहीलाही होत आहे. त्यात मुस्लिम समाज बांधवांचा पवित्र रमजान महिना सुरु झाल्याने मुस्लिम बांधव रोजा (उपवास) ठेवतात. मात्र, सतत विजेच्या लपंडावामुळे पंखे, कुलर बंद राहत असल्याने नागरिकांचा घाम निघत आहे. त्यामुळे महावितरण्च्या कारभाराविरुद्ध नागरिकांनी संताप व्यक्त केला आहे.