ऑटो रिक्षाचालक भागवतोय सर्वसामान्यांची तहान

उमरगा - कडक उन्हामुळे घामाघूम होणाऱ्या नागरिकांना पिण्यासाठी जारचे थंड पाणी उपलब्ध करीत एका ऑटो रिक्षाचालकाने सामाजिक बांधिलकी जपली. राष्ट्रीय महामार्गालगत भरणाऱ्या आठवडे बाजारात रविवारी (ता. १२) त्यांनी उपलब्ध केलेल्या थंड पाण्यामुळे सर्वसामान्यांना रखरखत्या उन्हात दिलासा मिळाला.

राष्ट्रीय महामार्गावर असलेल्या उमरगा शहरात यंदा उन्हाळ्यात पाणपोईचा उपक्रम दिसून आला नाही. याबाबत रविवारी ‘सकाळ’मध्ये वृत्त प्रसिद्ध झाले आहे. शहरात विविध राजकीय पक्षांचे पदाधिकारी, लखोपती, विविध संघटना कार्यरत आहेत. त्यांना पाण्याची सोय करण्याची जाणीव झाली नाही, मात्र दररोजचा उदरनिर्वाह ऑटोरिक्षा व्यवसायातून चालविणारे चालक रफिक अत्तार यांना मात्र सामाजिक बांधिलकीची जाणीव झाली. त्यांनी रविवारी सकाळी दहापासून दिवसभर तीस थंड पाण्याचे जार नागरिकांच्या सेवेत ठेवले. आठवडे बाजारातील व्यापारी, ग्राहक व रस्त्याने जाणाऱ्या नागरिकांना त्यांच्या या उपक्रमाने दिलासा मिळाला. प्रत्येक आठवडे बाजारात नागरिकांसाठी थंड पाण्याच्या जारची सुविधा उपलब्ध करणार असल्याचे श्री. शेख यांनी सांगितले.