बीड : अंबाजोगाई शहरात पहिला पाऊस

अंबाजोगाई : शहर परिसरात मंगळवारी दुपारी अर्धा तास जोरदार पाऊस झाला. या हंगामातील हा पहिलाच पाऊस. या पावसाने वाण नदीच्या पुलावरून पाणी वाहिले. त्यामुळे तालुक्यातील येल्डा या गावाकडे जाणारी वाहतूक ठप्प झाली होती. पाणी ओसरेपर्यंत तासभर अनेकांना अडकून राहावे लागले. दरम्यान, केज तालुक्याच्या काही भागात पाऊस झाला.

मृग नक्षत्र सरले तरी तालुक्यात पाऊस नव्हता. साकुड व पोखरी शिवाराचा काही भाग वगळता अद्याप कुठेच पेरण्यांना सुरवात झालेली नाही. आज दुपारी अंबाजोगाई शहर व डोंगरी भागात जोरदार पाऊस झाल्याने, वाण नदी प्रथमच खळाळली. या नदीच्या पुलावरून पाणी वाहू लागल्याने दोन्ही बाजूने वाहतूक ठप्प झाली होती. सकाळी शहरात आलेल्या दूध व्यावसायिक शेतकऱ्यांना दुपारी गावाकडे परतताना याठिकाणी थांबावे लागते. मागील वर्षी १२ जूनला या नदीला पूर आला होता. त्यावेळीही वाहतूक ठप्प झाली होती. दरम्यान, आजचा पाऊस तालुक्यात सर्वत्र नव्हता.

रस्त्याची मोठी अडचण

अंबाजोगाई- येल्डा रस्ता केवळ १० ते १२ किलोमीटरचा असून दोन वर्षांपासून त्याचे काम अपूर्ण आहे. रस्ता खोदून ठेवलेला आहे. त्यामुळे दुचाकी चालविणेही कठीण झाले आहे. पाऊस झाल्यास चालणेही मुश्कील होईल. संबंधित कंत्राटदाराने काम पूर्ण करावे किंवा तात्पुरत्या उपाययोजना तरी कराव्यात अशी येल्डा ग्रामस्थांची अपेक्षा आहे.

हिंगोलीत पाऊस

हिंगोली शहर आणि परिसरात आज सायंकाळी साडेसातच्या सुमारास मेघगर्जनेसह मध्यम स्वरूपाचा पाऊस झाला. दरम्यान, पेरणीसाठी शेतकऱ्यांना अद्यापही मोठ्या पावसाची प्रतीक्षा आहे. औरंगाबाद जिल्ह्याच्या काही भागातही हलका पाऊस झाला.

नांदेडला जोरदार आगमन

नांदेड शहरासह परिसरात रात्री आठच्या सुमारास पावसाचे आगमन झाले. काही ठिकाणी विजांच्या कडकडाटासह जोरदार पाऊस झाला. शहरातील वजिराबाद, शिवाजीनगर, तरोडा बुद्रूक भागात जुन्या गावात मुसळधार पाऊस झाला. चैतन्यनगर, वाडी, छत्रपती चौक, पावडेवाडी नाका भागातही पाऊस झाला. भोकर तालुक्यात पाऊस जोरदार झाला.