लाच घेताना बीडचा बीडीओ जाळ्यात, सार्वजनिक विहीरींच्या देयकासाठी घेतले ३७ हजार

बीड : महात्मा गांधी राष्ट्रीय ग्रामीण रोजगार हमी (मनरेगा) योजनेतून खोदलेल्या सार्वजनिक विहिरींच्या खोदकामाचे देयक अदा करण्यासाठी ३७ हजारांची लाच घेताना गटविकास अधिकारी नारायण मिसाळ यास लाच लुपचपत प्रतिबंधक पथकाने बुधवारी (ता.१७) रात्री रंगेहाथ पकडले. नारायण मिसाळ याच्याकडे बीड व पाटोदा पंचायत समितीच्या गटविकास अधिकारी पदांचा पदभार आहे.

वाचा : राज्याचे उपमुख्यमंत्री अजित पवारांच्या मावशीचे निधन, वीस मिनिटांची भेट ठरली शेवटची

पाटोदा तालुक्यातील कंत्राटदार तक्रारदाराने पाटोदा तालुक्यात १० ते १२ सार्वजनिक विहिरींची खोदकामे केली. महात्मा गांधी राष्ट्रीय ग्रामीण रोजगार हमी योजनेतून केलेल्या खोदकामांचे देयक अदा करण्याची मागणी कंत्राटदाराने गटविकास अधिकारी नारायण मिसाळ याच्याकडे केली. यासाठी मिसाळने ५० हजार रुपये लाचेची मागणी केली. याबाबत संबंधिताने लाच लुचपत प्रतिबंधक विभागाकडे तक्रार केली.

वाचा : रक्ताच्या थारोळ्यात पडलेल्या आईजवळ बसून चिमुकले बहीण-भाऊ दिवसभर रडले, बापाच्या कृत्याने शेजारी गेले चक्रावून

तक्रारीची पडताळणी केल्यानंतर त्यात तथ्य आढळल्याने पथकाने सापळा रचला. दरम्यान, तडजोडीअंती ३७ हजार रुपये देण्याचे ठरले. बुधवारी सायंकाळी बीड शहरातील चऱ्हाटा फाटा येथील स्वत:च्या घरी लाच स्वीकारताना पथकाने नारायण मिसाळ यास रंगेहाथ अटक केली. या प्रकरणी शिवाजी नगर पोलिस ठाण्यात गुन्हा नोंद करण्याची प्रक्रिया सुरु आहे. लाच लुचपत प्रतिबंधक पथकाचे पोलिस उपअधीक्षक बाळकृष्ण हानपुडे यांच्या पथकाने ही कारवाई केली.

वाचा : विहिरीला पाणी न लागल्याने तरुण शेतकऱ्याने गळफास घेऊन संपवले आयुष्य, कसाबसा रेटला संसाराचा गाडा

संपादन - गणेश पिटेकर