धनंजय मुंडेंविरोधात न्यायालयात दोषारोपपत्र 

बीड - जगमित्र साखर कारखान्यासाठी शेतकऱ्याची जमीन घेतल्यानंतर त्याला दिलेला धनादेश न वटल्याने दाखल झालेल्या फसवणुकीच्या गुन्ह्यात विधान परिषदेतील विरोधी पक्षनेते धनंजय मुंडे यांच्या विरोधात अंबाजोगाईच्या प्रथमवर्ग न्यायदंडाधिकारी न्यायालयात दोषारोपपत्र दाखल करण्यात आले. याप्रकरणी बर्दापूर (ता. अंबाजोगाई) पोलिस ठाण्यात गुन्हा दाखल झाला होता. 

अंबाजोगाई तालुक्‍यातील शेतकरी मुंजा किसनराव गीते (रा. तळणी) यांची तीन हेक्‍टर 12 आर. जमीन जगमित्र साखर कारखाना उभारणीसाठी खरेदी करण्यात आली. गीते यांच्या मुलासह चौघांना साखर कारखान्यात नोकरी लावून देण्याची हमी देण्यात आली होती. मात्र, संबंधित जमिनीसाठी दिलेला धनादेश वटला नाही आणि नोकरीचा शब्दही पाळला नाही, त्यामुळे धनंजय मुंडे यांनी या शेतकरी कुटुंबाची फसवणूक केल्याप्रकरणी बर्दापूर पोलिसात फसवणुकीसह विविध कलमांखाली गुन्हा नोंद झाला होता. बर्दापूर पोलिसांनी या प्रकरणात धनंजय मुंडे यांच्यावर दोष ठेवत अंबाजोगाईच्या प्रथम वर्ग न्यायदंडाधिकाऱ्यांकडे दोषारोपपत्र दाखल केले आहे.