मुलीची छेड काढल्याने मुलाची अर्धनग्न धिंड

मुक्रमाबाद :  रावी (ता. मुखेड, जि. नांदेड) येथे आमच्या मुलीची छेड का काढलीस ? म्हणून गावातील काही लोकांनी व मुलीच्या नातेवाईकांनी एका तरुणाला मारहाण करत अर्धनग्न अवस्थेत धिंड काढली. तसेच या घटनेचे मोबाईलने चित्रीकरण करून सोशल मीडीयावर टाकून बदनामी केल्याचा प्रकार रविवार (ता. ७ ) रोजी घडला. यातील पंधरा आरोपीविरूद्ध शुक्रवार (ता.12) रोजी मुक्रमाबाद पोलिस ठाण्यात गुन्हे दाखल करण्यात आले आहेत.

रावी येथील एका मुलीच्या नातेवाईकांनी व गावातील काही लोकांनी गावातीलच असलेल्या गुणवंत बडगणे या तरुणाविरूद्ध मुक्रमाबाद पोलिस ठाण्यात विनयभंगाचा गुन्हा दाखल केला होता. तरीही त्याला याच लोकांनी बोलावून घेऊन 'तू आमची मुलगी घरात एकटी असल्याचे पाहून मनात वाईट हेतू ठेऊन घरात घुसून मुलींची छेड का काढलीस?',  असा जाब विचारत अश्लील भाषेत शिवीगाळ करत प्रत्येकजणांनी लाथाबुक्क्यांनी जबर मारहाण करून गंभीररित्या जखमी केले. आपल्या मुलाला होत असलेली मारहाण पाहून सोडविण्यासाठी गेलेल्या मुलाच्या वडिलांनाही बेदम मारहाण केली.

तसेच मुलाच्या अंगावरील कपडे फाडून धिंड काढली व मोबाईलद्वारे व्हिडीओ चित्रीकरण करून  सोशल मिडीयावर टाकून बदनामी केली असल्याची तक्रार  लक्ष्मण पंढरीनाथ बडगणे, यांनी दिली. यावरून यादव रामलाल राठोड , यांच्यासह इतर चौदा जणांविरुद्ध मुक्रमाबाद पोलिस ठाण्यात गुन्हे दाखल करण्यात आले असून पुढील तपास पोलिस निरीक्षक गुंगेवाड हे करीत आहेत.