'त्या' क्‍लिपमध्ये छेडछाड : डॉ. चोपडे

औरंगाबाद : "माझ्या नावाने व्हायरल होत असलेल्या ऑडिओ क्‍लिपमध्ये छेडछाड केली आहे. हा मला ट्रॅप करण्याचा प्रयत्न दिसतोय. प्राथमिक चौकशीनंतर याप्रकरणी पोलिसांत गुन्हा दाखल करण्यात येईल.'' असे डॉ. बाबासाहेब आंबेडकर मराठवाडा विद्यापीठाचे कुलगुरु डॉ. बी. ए. चोपडे यांनी पत्रकार परिषदेत खुलासा केला. दरम्यान, क्‍लिपमधील वादग्रस्त वक्‍तव्यावर कुलगुरुंनी स्पष्टपणे बोलणे टाळले. 

डॉ. चोपडे म्हणाले, त्या क्‍लिपमध्ये आवाज माझा असला तरी ही घरातील चर्चा आहे. ती कुलगुरु म्हणून अधिकृत टिपण्णी नाही. कोणीतरी अनेक चर्चा एकत्रित करुन वाक्‍ये जोडली आहेत. हेतूपुरस्सर बदनामी करण्याचा हा कट आहे. पोलिस आयुक्‍तांशी याबाबत बोललो आहे. प्राथमिक चौकशी झाल्यानंतर गुन्हा दाखल करण्यात येईल. तसेच यातील दोषींवर कठोर कारवाई करण्यात येईल. आठवड्यानंतर प्रतिक्रिया देत असल्याच्या प्रश्नावर डॉ. चोपडेंनी कायदेशीर सल्ला घेऊन कार्यवाही करत असल्याने वेळ होत असल्याचे सांगितले.

पत्रकार परिषदेला प्र - कुलगुरु डॉ. अशोक तेजनकर, कुलसचिव डॉ. साधना पांडे, परीक्षा व मुल्यमापन मंडळाच्या संचालक डॉ. जयश्री सुर्यवंशी यांच्यासह अधिष्ठातांची उपस्थिती होती.