पाच वर्षांच्या चिमुकलीला वाटी गरम करून चटके

औरंगाबाद - अनैतिक संबंधात अडसर ठरणाऱ्या पोटच्या पाच वर्षांच्या चिमुकलीला आई व तिच्या प्रियकराने गॅसवर वाटी गरम करून सर्वांगाला चटके दिल्याचा धक्कादायक प्रकार मुकुंदवाडी भागात समोर आला आहे. जिवाच्या आकांताने रडणाऱ्या चिमुकलीला त्यानंतर नराधम प्रियकराने बेदम मारहाणही केली. यात गंभीर जखमी झालेल्या चिमुकलीवर सध्या उपचार सुरू आहेत.  

राहुल रावसाहेब पवार (रा. राहुलनगर, कातपूर, ता. पैठण) असे संशयित प्रियकराचे नाव आहे. मुकुंदवाडी पोलिसांनी सांगितले, की पोरगाव (ता. पैठण) येथील सुमनबाई (नाव बदललेले आहे) ही पतीला अर्धांगवायूचा आजार झाल्यामुळे त्याला सोडून तिन्ही मुलांसह घर सोडून राहुल सोबत मुकुंदवाडीत राहते; मात्र तिची मुले अनैतिक संबंधात अडसर ठरत होती. मंगळवारी (ता.२३) राहुलने पाचवर्षीय चिमुकलीला बाहेर जाण्यास सांगितले; पण ती घरातच खेळत असल्याने राहुलने गॅसवर वाटी गरम करून तिच्या सर्वांगाला चटके दिले. एवढ्यावरच तो थांबला नाही, तर तिच्या ओठाला जबर चावा घेतला. 

या प्रकारानंतरही तिला बेदम मारहाण करण्यात आली. गंभीर जखमी झालेल्या चिमुकलीला २३ एप्रिलला दवाखान्यात भरती करण्यात आले. तिची प्रकृती गंभीर असल्याने हा प्रकार सुमनबाईच्या भावाने तिच्या दिराला कळविला व औरंगाबादला आले. त्यांनी पुतणीची विचारपूस केली असता हा प्रकार समोर आला. या प्रकरणी चिमुकलीच्या चुलत्याच्या तक्रारीवरून विनयभंग, पोक्‍सो कायद्यानुसार गुन्हा नोंद करण्यात आला आहे. तपास उपनिरीक्षक मीरा चव्हाण करीत आहेत.