लोहाऱ्यात वीज कोसळली, गायीचा मृत्यू, शेतकरी जखमी ! 

लोहारा (उस्मानाबाद) : सलग दुसऱ्या दिवशीही शहरासह तालुक्यातील अनेक भागांत रविवारी (ता.२०) दुपारी मेघगर्जनेसह जोरदार पाऊस झाला. दरम्यान, वीज कोसळल्याने गाय मृत्यूमुखी पडली. तर ४१ वर्षीय शेतकरी गंभीर जखमी झाला आहे. त्यांना उस्मानाबाद येथील शासकीय रूग्णालयात दाखल करण्यात आले आहे. ही घटना हिप्परगा (रवा) शिवारात दुपारी सव्वा चारच्या सुमारास घडली.

मराठवाड्यातील अन्य बातम्या वाचण्यासाठी यावर क्लिक करा..!

मागील आठ दिवसापासून तालुक्यात पावसाची संततधार सुरू आहे. मात्र शनिवारी (ता. १९) दुपारी दीडच्या सुमारास शहरासह तालुक्यातील अनेक भागांत एक तास मुसळधार पाऊस झाला. त्यानंतर तीन तास मध्यमस्वरूपाचा पाऊस झाला. त्यामुळे नदी, नाले प्रवाहीत झाले. सलग पडणाऱ्या पावसामुळे बहुतांश शेती पाण्याखाली गेली आहे. अनेकांचे बांधबंधारे फुटून शेतीचे मोठे नुकसान झाले आहे. हातातोंडाला आलेल्या सोयाबीन पिकांची प्रचंड हाणी झाली आहे. सुमारे २० हजार हेक्टरवरील सोयाबीन पिकांची नासाडी झाल्याचा प्राथमिक अंदाज आहे. 

औरंगाबाद जिल्ह्यातील महत्त्वाच्या बातम्या वाचण्यासाठी येथे क्लिक करा.

सतत पडणाऱ्या पावसामुळे वित्त हानी बरोबरच आता जीवित हानी होऊ लागली आहे. शनिवारी मुसळधार झालेल्या पावसानंतर दुसऱ्या दिवशी रविवारी (ता.२०) दुपारी तीन ते पाच वाजेपर्यंत मेघ गर्जनेसह मोठा पाऊस झाला. तालुक्यातील हिप्परगा (रवा) येथील शिवारात वीज कोसळल्याने हणुमंत किसन चिंचोळी यांची दुभती गाय मृत्यूमुखी पडली. तर रवींद्र नगराळे (वय ४१) हे शेतकरी भाजल्याने गंभीर जखमी झाले आहेत. येथील ग्रामीण रूग्णालयात उपचारासाठी आणले होते. परंतु प्रकृती गंभीर असल्याने प्राथमिक उपचार करून त्यांना उस्मानाबाद येथील शासकीय रूग्णालयात दाखल करण्यात आले आहे.

देशभरातील महत्त्वाच्या बातम्या वाचण्यासाठी येथे क्लिक करा.

(संपादन-प्रताप अवचार)