हिंगोलीतील दगडफेक प्रकरणात दीडशे जणांवर गुन्हे दाखल

हिंगोली : हिंगोली शहरातील दगड प्रकरणांमध्ये शहर पोलिसांनी दीडशे जणांवर सोमवारी (ता. 12) रात्री उशिरा गुन्हा दाखल केला असून पंधरा जणांना चौकशीसाठी ताब्यात घेतले आहे.

हिंगोली शहरातील औंढा रोड भागात कावड यात्रेवर दगडफेक झाल्याची घटना सोमवार (ता. 12) सकाळी घडली यावेळी जमावाने वाहनांवर दगडफेक केली. या दगडफेकीत मध्ये दुचाकी वाहन ऑटो तसेच तीन बसेस व टेम्पोचे नुकसान झाले आहे. जमावाने नांदेड नाका, बस स्थानक परिसर, मस्तानशाहा नगर, देवडा नगर, बसस्थानकातील वाहतूक नियंत्रण कक्ष या ठिकाणी जाऊन तोडफोड केली. यामुळे सुमारे अडीच लाख रुपयांचे नुकसान झाले. आहे यावेळी जमावाच्या दगडफेकीत मध्ये पोलीस कर्मचारी जखमी झाले.

दरम्यान दगडफेकीच्या घटनेचे सीसीटीव्ही फुटेज व पोलिसांनी केलेल्या छायाचित्रीकरणाची तपासणी करण्यात आली. यामध्ये पोलीस निरीक्षक अशोक घोरबांड यांच्या तक्रारीवरून शेख उमर शेख दाऊद, शेख शाहरुख शेख पप्पू, शेख इरफान, शेख अहमद, शेख तोफिक, शेख शाहरुख उर्फ दुंडा यांच्यासह दीडशे जणांवर दगडफेक करणे, सरकारी मालमत्तेचे नुकसान करणे, जिल्हाधिकाऱ्यांच्या जमावबंदी आदेशाचे उल्लंघन करणे, तसेच सरकारी कामात अडथळा आणणे यासह इतर आरोपावरून हिंगोली शहर पोलीस ठाण्यात गुन्हा दाखल केला आहे.

स्थानिक गुन्हे शाखेचे पोलिस निरीक्षक जगदीश भंडरवार, शहर पोलिस ठाण्याचे निरीक्षक अशोक घोरबांड, उपनिरीक्षक सूर्यकांत घेवारे, किशोर पोटे, यांच्या पथकाने धरपकड मोहीम सुरू केली आहे या मोहिमेमध्ये रात्री उशिरा पंधरा जणांना चौकशीसाठी ताब्यात घेण्यात आले आहे. याशिवाय सीसीटीव्ही फुटेजची तपासणी करून आरोपींचा शोध सुरू करण्यात आल्याचे पोलिसांनी सांगितले.

दरम्यान शहरात शांतता असून पोलिस बंदोबस्त कायम आहे. संवेदनशिल भागात पोलिस अधिकारी तैनात करण्यात आले आहे. या प्रकरणात निरपराध असलेल्या व्यक्तींवर कारवाई होणार नाही. मात्र दोषींवर कडक कारवाई करणार असल्याचे पोलिस निरीक्षक अशोक घोरबांड यांनी सांगितले.