जॉबकार्ड हाय, काम मिळंना, घर चालंना, म्हणून गाव सोडलं

जॉबकार्ड हाय, गावात काम मिळंना, सहा जणांचं घर चालवणं अवघड झालं, त्यामुळे गाव सोडून आडूळला (ता. पैठण) खडी केंद्राच्या दगड फोडण्याच्या कामासाठी आलो. दिवसभर काम करून दोघांत सातशे रुपये मजुरी मिळते. परवडत नसले तरी काम करण्याशिवाय पर्याय नाही. गावात काम मिळालं असतं तर इथं यायची वेळंच आली नसती, असे सांगताना दादाराव पवार यांनी ‘गरीब माणसाला काम मिळंना, सरकार काही करणारंय का?’, असा सवाल उपस्थित केला.

दादाराव नामदेव पवार (वय ३८) हे हिंगोली जिल्ह्यातील सेनगावचे. सेनगाव हे तालुक्‍याचे ठिकाण असले तरी दुष्काळी स्थितीमुळे गेल्या दोन-तीन महिन्यांपासून काम मिळणे कठीण झाले आहे. त्यामुळे दादाराव पवार यांच्यासह पाच जण सेनगावातून आडूळ परिसरातील खडी केंद्रासाठी दगड फोडण्याच्या कामावर आले आहेत. 

आठवड्यातून एकदा खर्चासाठी एक हजार रुपये उचल मिळतात, त्यातून स्वतःचा खर्च भागवून महिनाअखेर मिळालेल्या रकमेतून ते गावाकडे पैसे पाठवतात. पवार यांच्यासह त्यांच्या इतर साथीदारांकडेही जॉबकार्ड आहेत; मात्र रोजगार हमी योजनेतून कामे मिळत नसल्याने त्यांना स्वतःचे गाव सोडून आडूळ परिसरात यावे लागले आहे. शेती नाही, उत्पन्नाचा कोणताही स्रोत नाही, मजुरीचे मिळेल ते काम करण्याशिवाय पर्याय नाही. त्यात खरीप हंगामात पावसाअभावी पिके करपून गेली, रब्बीचा तर कोणी विचारही करत नाही. त्यामुळे शेतातील मजुरीची कामे मिळण्याची आशा मावळली आहे, पिण्याचे पाणी मिळणेही कठीण झाले आहे, अशा परिस्थितीत अनेक जण गाव सोडून काम मिळेल त्या ठिकाणी जात असल्याचे दादाराव पवार यांनी सांगितले. गावातच काम उपलब्ध करून द्यावे आणि किमान पिण्यासाठी पुरेसे पाणी मिळावे, अशी सरकारकडून त्यांची माफक अपेक्षा आहे.