कर्जबाजारी तरुण शेतकऱ्याची आत्महत्या; हदगाव तालुक्यातील घटना 

नांदेड : सततच्या नापिकीला कंटाळून एका तरूण शेतकऱ्याने विष पिऊन आत्महत्या केली. ही घटना खरटवाडी (ता. हदगाव) येथे शनिवारी (ता. 4) दुपारी घडली. 

खरटवाडी (ता. हदगाव) येथील शेतकरी विलास रंगराव शेबेटवाड (वय 30) यांच्या शेतात मागील काही वर्षापासून सतत नापिकी होत होती. कधी आवर्षण तर कधी ओला दुष्काळ यामुळे शेतकरी हवालदिल झाला होता. त्यामुळे तो कर्जबाजारी झाला. घरखर्च कसा करायचा या विवंचनेत असलेल्या विलास शेबेटवाड यांनी अखेर आत्महत्या करण्याचा निर्णय घेतला. शनिवारी दुपारी त्याने विष प्यायले. लगेच नातेवाईकांनी त्याला नांदेडच्या शासकिय रुग्णालयात दाखल केले. मात्र उपचार सुरू होण्यापूर्वीच त्याचा मृत्यू झाला. या प्रकरणी पोलिस नाईक डब्ल्यु. के. कांबळे यांच्या फिर्यादीवरुन मनाठा पोलिस ठाण्यात आकस्मिक मृत्यूची नोंद करण्यात आली आहे. तपास पोलिस हवालदार श्री. पवार हे करीत आहेत.