शेतकऱ्यांना तारण योजनेत चार कोटींचा फायदा

लातूर ः गेल्या काही वर्षांत हंगाम सुरू होताच बाजारपेठेत सोयाबीनचे भाव कोसळतात. यात शेतकऱ्यांचे मोठे आर्थिक नुकसान होते. हे लक्षात घेऊन येथील लातूर उच्चत्तम कृषी उत्पन्न बाजार समितीच्या वतीने सोयाबीन शेतमाल तारण योजना सुरू करण्यात आली आहे.

गेल्या सहा वर्षांत तेराशे शेतकऱ्यांनी या योजनेत सहभाग घेतला असून या शेतकऱ्यांना चार कोटी रुपयांचा फायदा झाला आहे, हे या योजनेचे मोठे यश आहे. अशा पद्धतीने शेतकऱ्यांना फायदा देणारी ही मराठवाड्यातील पहिली बाजार समिती ठरली आहे. 

50 हजार क्विंटलच्या घरात आवक
दरवर्षी हंगाम सुरू झाला, की बाजारपेठेत सोयाबीनची मोठी आवक असते. लातूरच्या बाजारपेठेत तर ही आवक 50 हजार क्विंटलच्या घरात जाते. आवक वाढल्याने सोयाबीनचे भाव कोसळतात. याचा मोठा आर्थिक फटका शेतकऱ्यांना बसतो. कमी किमतीत आपले सोयाबीन विकण्याची वेळ शेतकऱ्यांवर येते. हे लक्षात आल्यानंतर पणन मंडळातर्फे शेतीमाल तारण योजना राबविली जात आहे. या योजनेत शेतकऱ्यांनी ठेवलेल्या सोयाबीनला बाजार भावाच्या 75 टक्के रक्कम सहा टक्के व्याजदराने शेतकऱ्यांना दिली जाते. ज्या वेळेस बाजारपेठेत सोयाबीनला चांगला भाव येतो, त्या वेळेस हे सोयाबीन विकून शेतकऱ्यांनी आपला आर्थिक फायदा घ्यावा, असा या योजनेचा उद्देश आहे.

हे ही वाचा, राष्ट्रवादीचं ठरलं, अजितदादांना याचे सर्वाधिकार

सुमारे तेराशे शेतकऱ्यांचा सहभाग

योजनेची प्रभावी अंमलबजावणी लातूर उच्चतम कृषी उत्पन्न बाजार समितीच्या वतीने करण्यात आली आहे. बाजार समितीच्या या योजनेत 2013-14 ते 2018-19 या सहा वर्षांच्या कालावधीत सुमारे तेराशे शेतकऱ्यांनी सहभाग घेतला. त्यांनी सुमारे 46 हजार क्विंटल सोयाबीन या योजनेत ठेवले होते. यात बाजार समितीने या शेतकऱ्यांना 17 कोटी 18 लाख 18 हजार 258 रुपयांचे कर्ज वाटप केले होते.

बाजारपेठेत ज्या वेळेस भाव वाढले त्यावेळेस शेतकऱ्यांनी हे सोयाबीन विकले असून यात शेतकऱ्यांना चार कोटी सात लाख 39 हजार 876 रुपयांचा फायदा झाला आहे. शेतकऱ्यांना अशा पद्धतीने फायदा करून देणारी ही मराठवाड्यातील पहिली बाजार समिती आहे. 
 

लातूर बाजार समितीच्या बाजारपेठेत दरवर्षी सोयाबीनची आवक मोठी असते. आवक जास्त झाली की भाव कमी मिळतो. यात शेतकऱ्यांचे नुकसान होते. हे लक्षात घेऊन ही योजना सुरू केली. याला शेतकऱ्यांनीही मोठा प्रतिसाद दिला. यातून त्यांना हा फायदा झाला आहे. बाजारपेठेवर लक्ष ठेवून सोयाबीन विकले पाहिजे. फायदा निश्‍चित होतो. यावर्षी देखील बुधवारपासून ही योजना शेतकऱ्यांसाठी सुरू करण्यात येत आहे. 
ललित शहा, सभापती, लातूर उच्चत्तम कृषी उत्पन्न बाजार समिती.