सोयाबीनची बोंब, फुटेना कोंब 

जालना - जिल्ह्यात अनेक ठिकाणी सोयाबीन बियाणे बोगस असल्याची तक्रार शेतकऱ्यांनी केली आहे. पेरणी करून आठवडा झाला तरी बियाणे उगवले नसल्याने या शेतकऱ्यांवर दुबार पेरणीचे संकट ओढवले आहे. 

खरीप हंगामात बोगस व परवाना नसलेल्या बियाणांची विक्रीवर कृषी विभागाच्या पथकाची नजर आहे. भोकरदन तालुक्यात अशा प्रकारे बोगस कपाशी बियाणे विक्री करणाऱ्या कृषी सेवा केंद्रचालकाविरोधात गुन्हाही दाखल करण्यात आला आहे; मात्र जिल्ह्यात अनेक ठिकाणी शेतकऱ्यांनी पेरणी केलेले सोयाबीन बियाणे बोगस असल्याची तक्रारी येत आहे.

हेही वाचा : पीककर्जावर शेतकऱ्यांची मदार

पीककर्ज मिळण्यास अडचणी येत असलेल्या शेतकऱ्यांनी खासगी कर्ज काढून खरीप हंगामात पेरणी केलेली आहे. त्यात बियाणे उगवले नसल्याने शेतकऱ्यांवर दुबार पेरणीचे संकट आले आहे.

हेही वाचा : कोरोनाबाधिताच्या अंत्यविधीला तब्बल शंभर जण

जालना व मंठा तालुक्यात या बियाणाबाबत शेतकऱ्यांच्या तक्रारी आहे. मंठा तालुक्यातील किर्ला या गावातील शेतकरी विकास खंदारे यांनी एका वाणाची गेल्या आठवड्यात पेरणी केली होती. आठ दिवस झाले तरीसुद्धा सोयाबीन उगवले नसल्याची त्यांची तक्रार आहे. 

तात्काळ पंचनामे करा : लोणीकर

बियाणांबाबत शेतकऱ्यांच्या तक्रारीची दखल घेऊन कृषी विभागाने तात्काळ पंचनामे करावेत, तसेच अशा प्रकारचे बियाणे विक्री केलेल्या विक्रेत्यांसह उत्पादन कंपनीवर गुन्हा दाखल करावेत, अशी सूचना माजीमंत्री तथा आमदार बबनराव लोणीकर यांनी प्रशासनाला दिल्या आहेत. 

जमिनीत पुरेसा ओलावा असताना पेरणी केलेली असल्यास पाच ते सहा दिवसांत पीक उगवून येते. जर कमी आले असताना पेरणी केली असल्यास उगवणीबाबत समस्या येऊ शकतात. तरी देखील बियाणाबाबत तक्रार करण्यासाठी शेतकऱ्यांनी बियाणे खरेदीची पावती घेऊन उपविभागीय कृषी अधिकाऱ्यांकडे तक्रार अर्ज दाखल करावा. तक्रार निवारण समिती याबाबत तपासणी करून अहवाल सादर करेल. त्यानंतर पुढील कार्यवाही करण्यात येईल. 
- विजय माईनकर, उपसंचालक जालना 

एक हेक्टरवर गेल्या आठवड्यात खासगी कंपनीच्या सोयाबीन बियाणाची पेरणी केली होती. अजूनही ते उगवले नाही. सध्या हे बी मातीत खराब झाले आहे. 
- विकास खंदारे, शेतकरी मंठा 

पुरेशी ओल असताना चार एकरवर एका कंपनीचे सोयाबीन बियाणे पेरले होते. ते उगवले नाही. पेरणीनंतर सातत्याने पाऊस झाला आहे. 
- गीतेश्‍वर ढेंगळे, 
मानेगाव, ता. जालना