बीडमध्ये पत्नीच्या छळामुळे वनरक्षकाने केली आत्महत्या

बीड: वनरक्षक अनिल आबासाहेब जगताप (रा. टाकळसिंग, ता. आष्टी) याने दीड महिन्यापूर्वी (ता. २८ मे) केलेली आत्महत्या पतीच्या छळामुळेच झाल्याचे समोर आले आहे. याबाबत पत्नी आश्विनीसह तिचे आई-वडील व भावाविरुद्ध आष्टी पोलिस ठाण्यात आत्महत्येस प्रवृत्त केल्याचा गुन्हा नोंद झाला. शिरूर तालुक्यात वनरक्षक असलेले अनिल जगताप यांनी मुगगाव रोडवर झाडाला गळफास लाऊन आत्महत्या केली. त्यांचे वडील आबासाहेब जगताप यांच्या फिर्यादीवरून पत्नी आश्‍विनी अनिल जगताप हिच्यासह तिचे वडील आजिनाथ देवराव भवर, आई विजूबाई देवराव भवर व भाऊ महेश आजिनाथ देवराव भवर (तिघेही रा. देसूर) यांच्या विरोधात आत्महत्येस प्रवृत्त केल्याचा गुन्हा नोंद झाला.

‘लग्नाअगोदरच्या पगाराचा हिशेब दे’ म्हणून आश्‍विनी अनिल जगताप यांचा सतत छळ करीत होती. तसेच आई-वडिलांना पैसे दिले म्हणून तीने पतीला मारहाणही केली. जमीन, प्लॉट नावावर कर म्हणून सतत तगादा लावत होती. दरम्यान, काही महिन्यांपूर्वी ती कुटुंब नियोजन शस्त्रक्रियेचे कारण काढून माहेरी गेली. पतीने बोलविल्यानंतर प्लॉट व जमीन नावावर केल्याशिवाय आपण येणार नाही असे तिने पती अनिलला बजावले. या सततच्या छळाला कंटाळून त्यांनी आत्महत्या केली.