कचऱ्याला सलग तिसऱ्या दिवशी आग

औरंगाबाद - कचऱ्यावर प्रक्रिया करण्यात मर्यादा येत असल्याने महापालिकेकडून कचरा गाळे, उद्यानात साठवणुकीचा गंभीर प्रकार उघड झाला. सलग दोन दिवस नेहरू उद्यानात साठविलेल्या कचऱ्याला आग लावल्यानंतर तिसऱ्या दिवशीही काडी लावीत माथेफिरूंनी खोडसाळपणाचा कळसच गाठला.

गेल्या सहा महिन्यांपासून कचऱ्याची समस्या सोडविण्यासाठी अफलातून, नानाविध क्‍लृप्त्या लढविण्यात आल्या. महापालिकेच्या काही गाळ्यांत तसेच चक्क उद्यानात कचरा साठवून नंदनवनाऐवजी कचरापट्टी तयार करणे सुरू आहे. 

सिडको एन-आठ येथील नेहरू उद्यानात कचरा संकलित करून तो चक्क पाच गाळ्यांत साठविल्याचा प्रकार ‘सकाळ’ने उघडकीस आणला. नेहरू उद्यानात २५ नोव्हेंबरला सकाळी सातच्या सुमारास कचऱ्याला आग लावण्याचा प्रकार घडला होता. त्यानंतर २६ व २७ नोव्हेंबरलाही पहाटेच्या वेळेतच आग लावण्यात आल्याने नागरिकांच्या संयमाचा कडेलोट झाला आहे.

कारवाई कधी?
नेहरू उद्यानात कचऱ्याला आग लावून प्रदूषणाला चालना देणाऱ्या तसेच बागेचे, परिसराचे विद्रुपीकरण करणाऱ्याविरुद्ध अद्याप गुन्हे नोंदविण्यात आलेले नाही. इतर ठिकाणीही आग लावणाऱ्यांवर तसेच कचरा अनधिकृतपणे साठवून आरोग्याला अपाय उत्पन्न करणाऱ्यांवरही ठोस कारवाई का केली जात नाही, असा नागरिकांच्या मनात सवाल आहे.

माजी सैनिकांना कचरा पेटवणाऱ्यावर लक्ष ठेवण्याचे सांगण्यात आले आहे. कचरा पेटवणाऱ्यांवर कारवाई करण्यासाठी त्यांना गस्त घालण्याच्या सूचना दिल्या आहेत. आग लावणाऱ्यांवर लवकरच कारवाई होईल.
- श्रीकृष्ण भालसिंग, अतिरिक्त आयुक्त, महापालिका