न्या. नरेंद्र चपळगावकर यांना मसापचा 'जीवनगौरव' 

औरंगाबाद : वाङ्‌मय, समाजजीवन, राजकारण आणि न्यायकारणाचे अभ्यासक निवृत्त न्या. नरेंद्र चपळगावकर यांना मराठवाडा साहित्य परिषदेचा सहावा जीवनगौरव पुरस्कार जाहीर झाला आहे. "मसाप'चे अध्यक्ष प्रा. कौतिकराव ठाले-पाटील यांनी सोमवारी (ता. 20) पत्रकार परिषदेत ही माहिती दिली. 

मराठवाडा साहित्य परिषदेच्या उभारणीत लक्षणीय योगदान देणाऱ्या लेखक, कार्यकर्त्यांच्या साहित्याचा व संस्थात्मक कार्याचा गौरव करण्यासाठी परिषदेने हा पुरस्कार सुरू केला आहे. आतापर्यंत डॉ. सुधीर रसाळ, डॉ. चंद्रकांत पाटील, ना. धों. महानोर, तु. शं. कुलकर्णी, मधुकरराव मुळे यांना या पुरस्काराने सन्मानित करण्यात आले आहे. सहाव्या पुरस्कारासाठी निवृत्त न्या. चपळगावकर यांची एकमताने निवड करण्यात आल्याचे प्रा. ठाले म्हणाले. 

तरुण वयापासून मसापशी जोडले गेलेले न्या. चपळगावकर पंधरा वर्षांहून अधिक काळ विश्‍वस्त मंडळाचे अध्यक्ष होते. साहित्य महामंडळावरही त्यांनी परिषदेचे प्रतिनिधित्व केले. पंचवीसहून अधिक वर्षे कार्यकारिणीचे सभासद राहिले. महाराष्ट्रातील व बाहेरील वाङ्‌मय व्यवहाराशी निगडित अनेक संस्थांचे ते सभासद आहेत. 2005 मध्ये माजलगाव येथे झालेल्या 26 व्या मराठवाडा साहित्य संमेलनाचे ते अध्यक्ष होते. मराठवाडा साहित्य संमेलनांच्या अध्यक्षांच्या भाषणांचे संपादन त्यांनी केले असून, त्यांची सुमारे 30 पुस्तके प्रसिद्ध आहेत. त्यांना महाराष्ट्र फाउंडेशनसह अनेक संस्थांचे वाङ्‌मयीन पुरस्कार मिळालेले आहेत. लवकरच विशेष समारंभात हा पुरस्कार त्यांना दिला जाईल, असे "मसाप'चे कार्यवाह डॉ. दादा गोरे यांनी सांगितले.