जिल्ह्यात हजारांवर कुपोषित बालके

सॅम १४१; तर मॅम बालकांची संख्या १,२९३
औरंगाबाद - जिल्ह्यात शून्य ते पाच वर्षे वयोगटातील तब्बल १ हजार ४३४ बालके कुपोषित आहेत. यामध्ये तीव्र काटकुळे आणि मध्यम काटकुळ्या बालकांचा समावेश आहे. याशिवाय अतिशय कमी वजनाच्या बालकांची संख्या ३ हजार १८८ इतकी आहे. 

सूत्रांकडून मिळालेल्या माहितीनुसार एप्रिल अखेरीस जिल्ह्यातील शून्य ते पाच वर्षे वयोगटातील ३ लाख ९५ हजार ३५३ बालकांचे वजन घेण्यात आले. त्यापैकी १ लाख ८६ हजार ५७० सर्वसाधारण बालके आढळली आहेत; तर मध्यम कमी वजनाच्या बालकांची संख्या १५ हजार ३७२ इतकी आहे. अतिशय कमी वजनाच्या बालकांची संख्या ३ हजार १८८ एवढी आढळली आहे. 

सॅम (सीव्हियर ॲक्‍यूट मालन्यूट्रिशन) म्हणजे अतिशय लुकडी किंवा काटकुळ्या बालकांची संख्या १४१ तर मॅम (मीडियम ॲक्‍यूट मालन्यूट्रिशन) बालकांची संख्या १ हजार २९३ एवढी आहे. या कुपोषित बालकांना कुपोषणातून बाहेर काढण्यासाठी त्यांना अंगणवाड्यांतून पूरक पोषण आहार दिला जात असल्याचे जिल्हा परिषदेच्या महिला व बालकल्याण विभागातील सूत्रांकडून सांगण्यात आले.