#MarathaKrantiMorcha बीड - काकासाहेब शिंदेंला जागोजागी श्रद्धांजली

बीड - मराठा आरक्षणासाठी आत्महत्या करणाऱ्या काकासाहेब शिंदे या तरुणाच्या निवेदनाकडे दुर्लक्ष केल्याच्या निषेधार्थ मंगळवारी (ता. २४) पुकारलेल्या बंदला जिल्ह्यात मोठा प्रतिसाद मिळाला. शहरांसह मोठ्या गावांमध्येही कडकडीत बंद पाळण्यात आला. बंदचे आवाहन करत युवकांनी दुचाकी फेऱ्या काढल्या. तसेच, जागोजागा काकासाहेब शिंदे यांना श्रद्धांजली वाहण्यत आली. 

बंदच्या कारणावरुन परळीत दोघांना जबर मारहाण झाली असून त्यांची प्रकृती गंभीर आहे. परळीत तणावपूर्ण शांतता असून कडक पोलिस बंदोबस्त लावण्यात आला.
मराठा समाजाला आरक्षण द्यावे, मेगा भरती थांबवावी या मागणीसाठी बुधवारी (ता. १८) परळीत पहिला मराठा क्रांती ठोक मोर्चा निघाला. त्यानंतर ठोस निर्णय होईपर्यंत माघार नाही असा पवित्रा घेत आंदोलनकर्त्यांनी सुरु केलेले ठिय्या आंदोलन मंगळवारी (ता. २४) सातव्या दिवशीही सुरुच आहे. दरम्यान, या आंदोलनाचे पडसाद राज्यभर उमटले असून सोमवारी काकासाहेब शिंदे या तरुणाने गोदावरी पात्रात उडी घेऊन जलसमाधी घेतली. आंदोलनकर्त्यांनी निवेदनात जलसमाधीचा इशारा देऊनही प्रशासनाने गांभीर्य दाखविले नाही. त्यामुळेच काकासाहेब शिंदेला जीव गमवावा लागला. याच्या निषेधार्थ मंगळवारी राज्यात बंद पुकारण्यात आला. बंदला जिल्ह्यात मोठा प्रतिसाद मिळाला. तालुक्यांच्या ठिकाणांसह आठवडी बाजारांची गावे आणि सर्कलच्या गावांमध्येही बंद पाळण्यात आला. व्यापारपेठा तसेच बस वाहतूक पुर्णपणे ठप्प आहे. नांदूरघाट व हिरापूर येथील आठवडे बाजारही बंद ठेवण्यात आली. बंदचे आवाहन करत युवकांनी दुचाकी फेऱ्या काढल्या. तसेच, जागोजाग काकासाहेब शिंदे यांना श्रद्धांजली अपर्ण करण्यात आली. परळीत बंदच्या कारणावरुन दोघांना जबर मारहाण झाली.