वीजपुरवठा खंडित होण्याचे हिंगोलीत प्रमाण वाढले

हिंगोली : शहरात मागील काही दिवसांपासून वीजपुरवठा खंडित होण्याचे प्रमाण वाढले आहे. दिवसा व रात्री देखील अर्ध्या तासाला वीजपुरवठा खंडित होत आहे. यातच वाढलेल्या उकाड्यामुळे नागरिकांची गैरसोय होत आहे. या प्रकाराकडे वरिष्ठांनी लक्ष देऊन वीजपुरवठा सुरळीत करण्याची मागणी होत आहे.

शहरात मागील काही दिवसांपासून दिवसभरात दहा ते पंधरा वेळेस वीजपुरवठा खंडित होत आहे. रात्री देखील वीजपुरवठा खंडित होण्याचे प्रमाण वाढले आहे. रविवारी सकाळी दहा वाजता खंडित झालेला वीजपुरवठा दुपारी अडीच वाजता सुरू झाला. पुन्हा चार वाजता बंद झाला, दहा मिनिटांनी परत सुरू झाला. शहरातील अनेक वसाहतीत हा प्रकार सुरू आहे. या बाबत महावितरण कंपनीकडे विचारणा केल्यावर ठिक आहे, पाहतो असे सांगितले जात आहे. मात्र, परत वीज पुरवठा खंडित होत आहे.