संग्रहित छायाचित्र
संग्रहित छायाचित्र

औरंगाबाद-अहमदाबाद-इंदूरला नवीन विमानसेवा सुरू

औरंगाबाद - औरंगाबादहून नवीन विमानसेवा सुरू करण्यासाठी होत असलेल्या पाठपुराव्याला यश येत आहे. नुकतीच ट्रुजेट कंपनीने अहमदाबाद-औरंगाबाद-इंदूर ही विमानसेवा सुरू करण्याची घोषणा केली आहे. या विमानसेवेमुळे औरंगाबादकरांना विमानसेवेच्या माध्यमातून इंदौरला हवाईसेवेने जोडले जाणार आहे. 

केंद्रीय नागरी विमान वाहतूक मंत्रालयाने देशातील छोट्या शहरांना विमानसेवेने जोडण्यासाठी महत्त्वाकांक्षी "उडान' योजना सुरू केली. त्यानंतर शिर्डी, मुंबई, नाशिक, नांदेड, कोल्हापूर, जळगाव शहरांसाठी विमानसेवा सुरू झाली. पुढच्या टप्प्यात औरंगाबादचा समावेश होईल असे वाटले होते; मात्र ही सेवा औरंगाबादकरांना मिळालीच नाही. शिर्डी येथे विमानसेवा सुरू झाल्यानंतर हैदराबादहून येणाऱ्या प्रवासीसंख्येवर परिणाम झाला. यातच विमान कंपन्यांद्वारे नवी सेवा सुरू होत नसल्याने चिंता व्यक्त करण्यात येत होती. म्हणूनच नवनियुक्त खासदार इम्तियाज जलील यांच्यासह उद्योजक संघटना, पर्यटन संघटना व विविध वर्गांतून नवी विमानसेवा सुरू करण्यासाठी प्रयत्न करण्यात येत होते.

देशांतर्गत पर्यटन, उद्योग आणि व्यवसायवाढीसाठी नवीन विमानसेवा सुरू करण्यासाठी टूर ऑपरेटर, उद्योजक आणि व्यावसायिकांच्या एका शिष्टमंडळाने स्पाईसजेट, इंडिगो एअरलाइन्स यासह अन्य विमान कंपन्यांकडे मागणी केली होती. त्यानंतर चिकलठाणा आंतरराष्ट्रीय विमानतळाला "इंडिगो'च्या अधिकाऱ्यांनी 19 जुलैला भेट देऊन सोयी-सुविधांचा आढावा घेतला. त्याचप्रमाणे नवीन सेवा सुरू करण्यासाठी लागणाऱ्या मनुष्यबळाची भरतीही केली आहे. ही सेवा लवकरच सुरू होण्याची शक्‍यता आहे. मात्र त्याही अगोदर ट्रुजेट कंपनीने आपल्या औरंगाबाद-अहमदाबाद-इंदौर या नवीन विमानसेवेची घोषणा केली आहे. ही घोषणा औरंगाबादकरांना सुखद धक्का देणारी आहे. 
 
महिनाभर राहणार प्रायोगिक तत्त्वावर 
ता. दोन सप्टेंबरपासून 31 ऑक्‍टोबरदरम्यान प्रायोगिक तत्त्वावर ही नवीन विमानसेवा सुरू करण्यात येणार आहे. दरम्यानच्या काळात मिळणारा प्रतिसाद पाहूनच पुढे ही विमानसेवा कायमस्वरूपी ठेवण्याच्या अनुषंगाने निर्णय घेण्यात येणार आहे. सध्यातरी सोमवार, मंगळवार, बुधवार, गुरुवार अशी आठवड्यातून चार दिवस ही सेवा चालविण्यात येणार आहे. विमानासाठी प्राथमिक भाडे 2,578 रुपये असणार आहे. 
  
असे आहे वेळापत्रक 

  • अहमदाबाद येथून निघण्याची वेळ : 4.10 (दुपारी) 
  • औरंगाबादला पोचण्याची वेळ : 5.35 (संध्याकाळी) 
  • औरंगाबादहून परतीला निघण्याची वेळ : 6.00 (संध्याकाळी) 
  • अहमदाबादला पोचण्याची वेळ : 7.25 (संध्याकाळी) 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com