लातूरचा सुपुत्र झाला गुवाहाटी वायूतळाचा प्रमुख एअर कमांडर

लातूर: आसाम राज्यातील गुवाहाटी येथे असलेल्या वायुदलाच्या बोरझर तळाचे प्रमुख एअर कमांडर म्हणून लातूरचे व्यंकट मरे यांनी पदभार स्वीकारला आहे. त्यांच्या या नियुक्तीने आणखी एक मानाचा तुरा लातूरच्या शिरपेचात खोवला आहे. 

लातूर जिल्ह्याला दुष्काळ हा पाचवीलाच पुजलेला आहे. मात्र गेल्या दोन दशकापासून जिल्ह्यातील तरुण करिअरच्या वेगवेगळ्या वाटा शोधताना विविध क्षेत्र पादाक्रांत करीत आहेत. उदगीर तालुक्यातील रहिवासी असलेल्या न्यायमुर्ती विजया कापसे या सध्या उच्च न्यायालयाच्या मद्रास खंडपीठाच्या मुख्य न्यायधीश म्हणून कार्यरत आहेत. काही महिन्यापूर्वी लातूरच्याच दोन न्यायाधीशांनी एकाच वेळी दोन वेगवेगळ्या खंडपीठाचे प्रमुख न्यायाधीश म्हणून पदभार स्वीकारला होता. तर आता राष्ट्रीय संरक्षण प्रबोधनीमध्ये शिक्षण पूर्ण केलेल्या आणि हेलिकॉप्टर पायलट म्हणून सहा हजार तासांपेक्षा अधिक उड्डाणाचा अनुभव असलेल्या एअर कमांडर व्यकंट मरे यांनी नुकताच एअर कमांडर शशांक मिश्रा यांच्याकडून तळप्रमुख पदाचा पदभार स्वीकारला. 

निलंगा तालुक्यातील चिलवंतवाडी येथील शेतकरी कुटुंबातील जन्मलेल्या व्यंकट मरे यांनी काही वर्षापूर्वी वायूदलाच्या उड्डाण विभागात सेवा सुरु केली. त्यांनी जम्मू काश्मीर आणि पूर्वांचलच्या (सात राज्य) विविध मोहिमांमध्ये महत्वाची भूमिका पार पाडली आहे. त्यांनी विलींग्टंनच्या सुरक्षा सेवा महाविद्यालयातून पदविका आणि महू येथील सेना महाविद्यालयातून पदव्युत्तर पदविका पूर्ण केली आहे. यापूर्वी ते पूर्वांचल, अंदमान आणि निकोबार बेटावरील वायूदलाच्या तळावर कार्यरत होते. तसेच, त्यांनी संयुक्त राष्ट्राच्या, कांगोतील लोकशाही प्रजासत्ताक मोहिमेतही महत्वपूर्ण सहभाग नोंदवलेला आहे. वायूदलातील या महत्वपूर्ण वाटचालीस शुभेच्छा देताना व्यकंट मरे यांच्या वर्गमित्रांनी, आम्हाला खूप खूप अभिमान वाटत असल्याच्या प्रतिक्रिया 'सकाळ'कडे व्यक्त केल्या.