उरलेसुरले पाणी शेंदण्यासाठी गर्दी

गेवराई - तालुक्‍यात उष्णतेचा पारा वाढत असून रस्ते निर्मनुष्य दिसत आहेत. पाण्याची भीषण टंचाई जाणवत असल्यामुळे वणवण भटकण्याची वेळ ग्रामस्थांवर आली आहे. शासकीय पाणीपुरवठा करणारे टॅंकर पाणी नसल्यामुळे बंद पडले आहेत. त्यामुळे प्रत्येक गावातील नागरिकांना विकतचे पाणी घेण्याची वेळ आली आहे. यामुळे नागरिक आर्थिक भुर्दंड सहन करीत आहेत.

दिवसेंदिवस वाढत चाललेला उन्हाचा पारा व भीषण पाणीटंचाई यामुळे सर्वच नागरिक नाहक त्रास सहन करीत आहेत. तालुक्‍यातील जाणाऱ्या गोदावरी पात्रामुळे तालुक्‍याचा पाणीप्रश्न सध्यातरी मार्गी लागत आहे; परंतु पैठण येथून सोडण्यात येणारे पाणी सहा दिवसांपासून बंद असल्यामुळे गोदावरी पात्र कोरडेठक पडले आहे. यामुळे नगरपरिषद गेवराईचा उद्भव असलेली पाण्याची टाकी कोरडी पडल्यामुळे तालुक्‍यात टॅंकरद्वारे होणारा पाणीपुरवठा बंद पडला आहे. यामुळे तालुक्‍यातील नागरिक खासगी टॅंकरद्वारे पाणी विकत घेत तहान भागवत आहेत. शासकीय पाणीपुरवठा करणारे टॅंकर गावात येताच सर्वाजनिक विहिरीवर पाणी शेंदण्यासाठी महिला, पुरुष व लहान मुले यांची गर्दी होत आहे. परिणामी जिवाची कदर न करता पाण्यासाठी नागरिकांची विहिरीवर एकच झुंबड दिसून येत आहे.