महिला चार्लींची ४० निर्जन स्थळांवर नजर

औरंगाबाद - महिलांच्या सुरक्षेसाठी महिला चार्ली पोलिस पथकांची नियुक्ती करून शहरात ४० निर्जन स्थळांची यादी पोलिसांनी काढली आहे. या निर्जनस्थळी महिला चार्ली पथक, दामिनी पथक गस्त घालणार आहे. या स्थळी रात्री विद्युत दिव्यांची व्यवस्था करावी, असे पत्रही पोलिस दलाने महापालिका प्रशासनाला पाठविल्याची माहिती सूत्रांनी दिली.

उच्च न्यायालयाच्या औरंगाबाद खंडपीठाने शहरातील निर्जन स्थळे शोधून तिथे सुरक्षा व्यवस्था करण्याचे आदेश पोलिसांना तीन वर्षांपूर्वी दिले होते. यानंतर सप्टेंबर २०१५ ला तात्पुरत्या उपाययोजनाही झाल्या. परंतु, विद्युत दिव्यांची व्यवस्था तेथे करण्यात आली नाही. 

यानंतर शहरात वर्ष २०१७ मध्ये निर्जन स्थळांची उपाययोजना थंड बस्त्यात होती. त्यानंतर पुन्हा आता शहरातील एकूण चाळीस निर्जन स्थळांची यादीच पोलिसांनी काढली आहे. तेथे नव्याने स्थापन केलेले महिला चार्ली पथक गस्त घालणार आहे. महिलांवरील अत्याचार, छेडछाड रोखण्यासंदर्भात डिसेंबर २०१८ मध्ये पोलिस आयुक्तालयात आढावा बैठक झाली होती. यात निर्जन स्थळांबाबत चर्चा करून प्रकाश व्यवस्थेबाबतही खल झाला. उपाययोजनेचा भाग म्हणून महापालिकेला पोलिसांनी निर्जन स्थळांची यादी दिली असून प्रकाश व्यवस्था करावी, याबाबत पत्राद्वारे सुचविण्यात आले आहे.