शवविच्छेदन केल्यानंतर पुन्हा स्मशानभूमीतच दुसऱ्यांदा शवविच्छेदन, उमरग्यातील तरुणाचा मृत्यू की घातपात?

उमरगा (जि.उस्मानाबाद) : तालुक्यातील गुंजोटी येथील एका वीस वर्षीय तरुणाचा मृतदेह पाण्याच्या हौदात सापडल्याचा प्रकार सोमवारी (ता.२२) उघडकीस आला आहे. दरम्यान त्याच्या तोंडावर व डोक्यावर जखमा असल्याने घातपाताचा संशय व्यक्त करण्यात येत असून शवविच्छेदन केल्यानंतर सरणावर झोपवलेल्या मृतदेहाचे स्मशानभूमीतच दुसऱ्यांदा शवविच्छेदन करण्यात आले.

वाचा - कोरोना काळात औरंगाबादचे राजकारणी इतके बेफिकीर कसे? ना मास्क, ना सोशल डिस्टन्सिंग; नियम काय जनतेनेच पाळायचे का ?

या बाबतची माहिती अशी की, गुंजोटी येथील कमलाकर गुंडू माने (वय ३०) हा तरुण ता.१९ फेब्रुवारीला दिवसभर शिवजयंती महोत्सव साजरा करुन सायंकाळी घरी गेला होता. जेवण करून परत तो रात्री शेताकडे जातो असे सांगून मित्रांसोबत गेला. तीन दिवसांपासून तो घरी परतला नसल्याने त्यांचा भाऊ जोतीराम गुंडू माने यांनी सोमवारी पोलिस ठाण्यात माझा भाऊ चार दिवसांपासून घरी आलेला नाही तो बेपत्ता असून त्याचा शोध घेण्याचे अर्ज केला होता. पोलिसांनी या प्रकरणात तपास सुरु केला आणि एका तासात उमरगा - गुंजोटी मार्गालगत असलेल्या जून्या इमारतीतील पाण्याच्या हौदात एक मृतदेह तरंगत असल्याचे दिसून आले.

वाचा - एकादशीनिमित्त उद्या नाथ मंदिर राहणार एक दिवस बंद, कोरोनामुळे प्रशासनाचा निर्णय

मृताच्या तोंडावर, डोक्याला व कानाच्या पाठीमागे जखमा असल्याची माहिती सांगण्यात आली. हा घातपात असल्याचा संशय असल्याचा नातेवाईकांनी संशय व्यक्त केला. दरम्यान पोलिसांनी मृतदेह उपजिल्हा रुग्णालयात दाखल केल्यानंतर वैद्यकीय अधिकारी डॉ.गरड यांनी शवविच्छेदन केले. मात्र घातपाताचा तपास करुन आरोपीला अटक करण्याची मागणी करत शवविच्छेदन केलेला मृतदेह ताब्यात घेण्यास नातेवाईकांनी विरोध केला. मात्र प्रशासनाने सर्वांची समजून काढून मृतदेह ताब्यात दिला.

वाचा - स्वप्नं पापण्यातले पापण्यातच विरले, कुटुंबाचा आधार होऊ पाहणाऱ्या जिद्दी प्रतिक्षाला काळाने अडविलेच

त्यानंतर नातेवाईकांनी मृतदेह ताब्यात घेतला व गुंजोटीच्या स्मशानभूमीत सायंकाळी अंत्यसंस्काराची तयारी जवळपास पूर्ण झाली होती. सांयकाळी सात वाजता मृतदेहाचे पुन्हा शवविच्छेदन करण्यात येणार असल्याचे सांगून अंत्यसंस्कार रोखण्यात आले. पहिल्यांदा शवविच्छेदन झालेले असताना दुसऱ्यांदा कशासाठी ? असा प्रश्न करून ग्रामस्थांनी त्यास विरोध केला. परंतु डॉक्टराने स्मशानभूमीतच मृतदेहातील विशिष्ट नमुन्याचे शॅम्पल घेतले. या प्रकरणी सध्या आकस्मिक मृत्यूची नोंद करण्यात आली असून हवालदार व्ही. के. मुंडे तपास करीत आहेत.

मराठवाड्याच्या ताज्या बातम्या वाचण्यासाठी येथे क्लिक करा

तरुणाच्या मृतदेहाचे शवविच्छेदन वैद्यकिय अधिकारी श्रीमती डॉ. गरड यांनी केले. तरुणाचा मृत्यू पाण्यात बुडून झाल्याची माहिती होती. मात्र त्यात मृत्युचे नेमके कारण स्पष्ट होत नव्हते. पोलिसांकडे प्राप्त झालेल्या तक्रारीमुळे पोलिसांनी मृत्यूच्या नेमक्या कारणासाठी पुन्हा शॅम्पल घेण्याचे सांगितले. डॉक्टरांनी वैद्यकीय महाविद्यालयातील तज्ज्ञांच्या सल्ल्यानुसार स्मशानभूमीत शरीरातील विशिष्ट प्रकारचे शॅम्पल घेतले आहे.
- डॉ. अशोक बडे, वैद्यकीय अधीक्षक, उपजिल्हा रुग्णालय

संपादन - गणेश पिटेकर