महापालिका शाळांत चौथी भाषा नकोच

 महापालिका शाळांत चौथी भाषा नकोच
महापालिका शाळांत चौथी भाषा नकोच

मुंबई ः मुंबईत चौथी भाषा खपवून घेणार नाही, असा  इशारा मनसे अध्यक्ष राज ठाकरे यांनी सभेत दिला होता. मुंबई महापालिका प्रशासनानेही आपल्या शाळांत चौथी भाषा नकोच, अशी ठाम भूमिका घेतली आहे. तीन भाषांव्यतिरिक्त अन्य भाषांचा भार विद्यार्थ्यांवर टाकणे मानसशास्त्रीयदृष्ट्या सयुक्तिक होणार नाही, असे प्रशासनाने म्हटले आहे. 

पालिकेच्या प्राथमिक शाळांत चौथीपर्यंतच्या मुलांना मातृभाषेसह इंग्रजी, हिंदी आणि संस्कृत भाषा आत्मसात करण्याचे वर्ग सुरू करावेत, अशी मागणी नगरसेवक भालचंद्र आंबोरे यांनी केली होती. त्या मागणीवर अभिप्राय प्रशासनाने देऊन तीन भाषांव्यतिरिक्त अन्य भाषांचा भार मुलांवर नको, असे स्पष्ट केले आहे.

प्रचलित शिक्षणपद्धतीत पहिली ते चौथीसाठी मातृभाषेव्यतिरिक्त इंग्रजी विषय  आहे. दोन भाषांव्यतिरिक्त पहिली आणि दुसरीच्या स्तरावर संभाषणकौशल्यासाठी मराठी भाषा अन्य भाषिक शाळांमध्ये अनिवार्य आहे. तिसरीपासून अन्य भाषिक शाळांमध्ये (उर्दू, तमीळ, तेलुगू, कन्नड व गुजराती) मराठी भाषेचे पाठ्यपुस्तक आणि तिची लेखी परीक्षा यांचा समावेश आहे. त्यांच्या वयोगटाला आवश्‍यक असणारा आणि मानसशास्त्रीयदृष्ट्या समर्पक अशा तीन भाषांचा समावेश अभ्यासक्रमात केलेला आहे. त्यामुळे चौथ्या भाषेचा भार मुलांवर नकोच, असे अभिप्रायात पालिका प्रशासनाने म्हटले आहे.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com