महाड तालुक्यातील आकले गावाला मिळालीय विशेष ओळख; गणेशोत्सवातील पूजेला लागणाऱ्या सुपांचे गाव म्हणून परिचित

महाड तालुक्यातील आकले गावाला मिळालीय विशेष ओळख; गणेशोत्सवातील पूजेला लागणाऱ्या सुपांचे गाव म्हणून परिचित

महाड : गणेशोत्सवात गणपतीच्या पूजेसाठी तसेच ओवशासाठी सुपांना मोठी मागणी असते. सध्या बाजारात विविध प्रकारची सुप उपलब्ध असली तर पारंपारिक पद्धतीने विणलेल्या सुपांनी विशेष महत्वाचे स्थान आहे. महाड तालुक्यातील आकले गावामध्ये गौरी-गणपती सणानिमित्त घरोघरी सुपे तयार करण्याची लगबग सुरु झाली आहे. आकले गावातील सुप्यांना कोकणासह मुंबई, पु्ण्यात मोठी मागणी असते. 

रायगडच्या महाड तालुक्यातील आकले हे गाव पारंपारिक सुपे तयार करण्यासाठी ओळखले जाते. येथील सूपे रायगड जिल्हा प्रमाणेच रत्नागिरी, मुंबई, पुणे व बडोदा या भागांमध्ये विक्रीसाठी जातात. आकले गावातील बुरुड समाज सुपे, आसने, दुरडी, हारे, परडी, टोपल्या वर्षभर तयार करत असतात. परंतु गणेशोत्सवात हा व्यवसाय भरभराटीस येतो. या गावातील तीसहून अधिक कुटुंब हा व्यवसाय करतात. सुपांमध्ये वेगवेगळ्या आकाराची तसेच एकेरी, दुहेरी, रूमानी, कात्री, फुलवटी आणि नवघटी अशा वीणकाम प्रकारची सूपे तयार करून विक्रीसाठी पाठवली जातात. एका बांबूच्या काठी पासून 4 ते 5 सुपे तयार केली जातात. 

आकले गावातील सुपे हाताने तयार केली जात असल्याने एका दिवसात तीन ते चार सुपे एक व्यक्ती तयार करतो. हाताने बनवल्यामुळे या सुपांना विशेष ओळख मिळाली आहे. सध्या बाजारामध्ये आकले गावचे सूप दीडशे ते दोनशे रुपयांपर्यंत उपलब्ध आहे. त्यामुळे गावातील नागरिकांना चांगला रोजगार मिळाला आहे. तरीही बांबूचा तुटवडा आणि प्लास्टिकच्या सुपांचे झालेल्या अतिक्रमणामुळे या पारंपारिक व्यवसायालाही आव्हानाला सामोरे जावे लागत आहे. 

बांबू विकास महामंडळाकडून नव्या पिढीला हा व्यवसाय टिकून राहावा आणि ही कला कायम राहावी तसेच बांबू व्यवसायातील नवनवीन कला अवगत करण्यासाठी प्रशिक्षण मिळावे, अशी येथील कारागीरांची अपेक्षा आहे. या व्यवसायासाठी योग्य दरात कर्ज पुरवठा झाल्यास व्यवसाय वाढवता येऊ शकेल, असे आकले येथील कारागीर शैलेश माने यांनी सांगितले.
----
संपादन ः ऋषिराज तायडे

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com