‘...आणि काशिनाथ घाणेकर’ला प्राईम टाईम

मुंबई - शिवसेना आणि मनसेने दिलेल्या आंदोलनाच्या इशाऱ्यानंतर ‘... आणि काशिनाथ घाणेकर’ या मराठी चित्रपटाला प्राईम टाईम देण्यास नकार देणारी चित्रपटगृहे; तसेच मल्टिप्लेक्‍सचालकांना शनिवारी नमते घ्यावे लागले. रविवारपासून या चित्रपटाला प्राईम टाईम देण्याची तयारी आता मल्टिप्लेक्‍सचालकांनी दर्शवली आहे. त्‍यामुळे सेना-मनसेच्‍या आंदोलनाला यश आले आहे.

रसिकांची पसंती मिळत असलेल्या या चित्रपटास सिंगल स्क्रीन चित्रपटगृहे; तसेच मल्टिप्लेक्‍समध्ये प्राईम टाईम मिळत नसल्याच्या तक्रारी ठाणे, कल्याण परिसरातून येत होत्या. या चित्रपटास प्राईम टाईम न मिळाल्यास खळ्ळ खट्ट्याक आंदोलन करण्याचा इशारा मनसेच्या चित्रपट सेनेचे अध्यक्ष अमेय खोपकर यांनी दिला. त्यानंतर नमते घेत रविवारपासून या चित्रपटाच्या खेळांची संख्या वाढवण्याचे; तसेच चित्रपटास प्राईम टाईम देण्याचे आश्‍वासन दिले. 
दादर-हिंदमाता येथील गोल्ड चित्रपटगृहातही या चित्रपटाला प्राईम टाईम न मिळाल्याच्या तक्रारी आल्या होत्या. त्यानंतर सेनेच्या चित्रपट सेनेचे चिटणीस बाळा लोकरे यांच्या नेतृत्वाखाली आंदोलन केले. आंदोलनानंतर चित्रपटगृहाच्या मालकाने या चित्रपटाचे खेळ वाढवण्याचे; तसेच प्राईम टाईम देण्याचे आश्‍वासन दिले.