मंदा म्हात्रेंची भाजपकडून मनधरणी 

नवी मुंबई : राष्ट्रवादीचे आमदार संदीप नाईक आणि माजी मंत्री गणेश नाईक यांच्या भाजप प्रवेशामुळे दुखावल्या गेलेल्या भाजपच्या आमदार मंदा म्हात्रे यांनी भाजपकडून मनधरणी सुरू झाली आहे. मुख्यमंत्री देवेंद्र फडणवीस यांच्या आदेशानुसार रायगडचे पालकमंत्री रविंद्र चव्हाण यांनी म्हात्रे यांची रुसवा दूर करण्याचा प्रयत्न केला. तसेच संदीप नाईक यांच्या प्रवेशाप्रसंगी उपस्थित राहण्याचे निमंत्रण दिले. 

नवी मुंबईतील नाईक कुटुंब आणि मंदा म्हात्रे यांचे मागील अनेक वर्षांपासून असणारे हाडवैर सर्वश्रुत आहे. राष्ट्रवादी काँग्रेस मध्ये नाईकांच्या एकाधिकारशाहीला कंटाळून म्हात्रेंनी राष्ट्रवादीला सोडचिठ्ठी दिली होती. त्यानंतर मंदा म्हात्रे भाजपमध्ये डेरेदाखल झाल्या. 2015 च्या विधानसभा निवडणुकीत मंदा म्हात्रे गणेश नाईकांच्या पराभवाच्या जायंट किलर ठरल्या होत्या. विधानसभेत नाईकांना पडल्यानंतर म्हात्रेंनी नंतर मागे वळून पाहिले नाही. ठाणे जिल्ह्यातुन सलग दोन वेळा शिवसेनेचा खासदार निवडून देण्यात म्हात्रेंचा हात होता. मात्र यानंतरही नाईक कुटुंब आज भाजप मध्ये जात असल्याने म्हात्रें नाराज झाल्या आहेत.

राष्ट्रवादीत असताना पंतप्रधान नरेंद्र मोदी आणि देवेंद्र फडणवीस यांच्यावर केलेली टीका त्यांना आठवत असल्याचे त्या सांगतात. नाईक कुटुंबाच्या भाजप प्रवेशाच्या चर्चांमुळे म्हात्रें नाराज असल्याने मंगळवारी सकाळी रवींद्र चव्हाण यांनी म्हात्रें यांच्या बेलापूर मधील गौरव निवासस्थानी जाऊन भेट घेतली. या भेटीत त्यांनी म्हात्रेंना उद्या संदीप नाईक यांच्या प्रवेश प्रसंगी उपस्थित राहण्याची विनंती केली. तसेच खास फडणवीस यांनी आपल्याला उपस्थित राहण्याचे निमंत्रण दिले असल्याचे सांगितले. 

भाजप पक्षात कोणाला घ्यायचे आणि कोणाला नाही याचा सर्वाधिकार पक्ष श्रेष्ठींचा आहे. पण उद्या होणाऱ्या कार्यक्रमाला मी उपस्थित राहणार नाही.
मंदा म्हात्रे, आमदार भाजप