सरळगावात गटविकास अधिकारी यांच्या कॅबीनला ठोकले टाळे

सरळगाव (ठाणे) -  मुरबाड पंचायत समितीचे गटविकास अधिकारी यांच्या मनमानीच्या विरोधात मुख्य कार्यकारी अधिकारी ठाणे यांच्याकडे केलेल्या तक्रारीची वेळीच दखल न घेतल्याने पंचायत समिती सदस्य, भाजपाचे पदाधिकारी व कार्यकर्त्यांच्या उपस्थितीत गटविकास अधिकारी यांच्या कॅबीनला टाळे ठोकून निषेध व्यक्त केला.       

अनेक महिने गटविकास अधिकारी व पंचायत समितीच्या सदस्यांमध्ये तू- तू मै-मै सुरु आहे. लोकप्रतिनिधींना विश्वासात घेत नसल्याचा आरोप हे सदस्य करीत आहेत. गटविकास अधिकारी यांच्या बदलीची मागणी करूनही जिल्हापरीषद याची दखल घेत नाही. तो पर्यंत आम्ही प्रशासकीय काम काम करून देणार नाही, अशी भूमिका आता भाजपानेही घेतल्याने जनतेचे लक्ष या घटनेकडे लागले आहे. आज सकाळी 11 वाजता गटविकास अधिकारी यांच्या विरोधात घोषणा देत सभापती जनार्दन पारधी, भाजपा तालुका अध्यक्ष जयंत सुर्यराव, मुरबाड नगरपंचायतीच्या नगराध्यक्षा शीतल तोंडलिकर, उपसभापती सीमा घरत, पंचायत समितीचे गट नेते श्रीकांत धुमाळ, शहर अध्यक्ष रूपेश गुजरे, पंचायत समितीचे सर्व सदस्य व भाजपाचे कार्यकर्त्यांच्या उपस्थितीत हा टाळा ठोकण्यात आला. जो पर्यंत प्रशासन गटविकास अधिकारी एस. ई. ए. हाश्मी यांची बदली होत नाही तो पर्यंत पंचायत समितीचे प्रशासकीय काम सुरु होऊ देणार नसल्याची भूमिका सर्व सदस्यांनी घेतल्याने या घटनेबद्दल प्रशासन कोणती भूमिका घेते या कडे लक्ष लागले आहे. मनमानी करून प्रशासन चालवित असलेल्या गटविविकास अधिकारी यांच्या विरोधात घेतलेली भूमिका शासनालाही कळावी या साठी तहसीलदार मुरबाड व पोलिस ठाणे मुरबाड यांचा लेखी पत्र देऊन कळविण्यात आल्याची माहीती माजी उपसभापती अनिल घरत यांनी  दिली. 

आपण एका क्लिकवर ताजे अपडेट्स आपल्या मोबाईलमध्येही मिळवू शकता.

• 'ई सकाळ'चे अॅप डाउनलोड करण्यासाठी क्लिक करा.
• शेतीविषयीची अपडेट असलेले 'अॅग्रोवन' अॅप डाउनलोड करण्यासाठी ​क्लिक करा.
• राजकारणाची प्रत्येक घडामोड कळविणारे 'सरकारनामा' अॅप डाउनलोड करण्यासाठी क्लिक करा.