बेस्ट भाडे कपातीचे पेढे भरवून स्वागत

मुंबई : बेस्ट प्रशासनाने किमान भाडे 5 रुपये केल्याने मुंबईकर प्रवासी बेस्ट प्रशासनावर खुश झाला आहे.बेस्ट प्रवाशांसाठी मंगळवारपासून स्वस्त दरात प्रवास सुरू झाल्यामुळे बोरिवली-दहिसरमध्ये प्रवाश्यांनी पेढे वाटून बेस्टच स्वागत केले.

शिवसेना युवा सेनाप्रमुख आदित्य ठाकरे यांच्या मागणी नंतर बेस्ट समिती, पालिका सभागृह व राज्य सरकार प्राधिकरणाने या भाडे कपातीस मंजुरी दिली होती. त्यामुळे म्हाडा सभापती विनोद घोसाळकर यांच्या मार्गदर्शनाखाली शिवसेना नगरसेविका तेजस्वी घोसाळकर, मुंबै बँक संचालक अभिषेक घोसाळकर व शिवसैनिकानी बोरिवली पश्चिममधील आय. सी. कॉलनी तसेच दहिसर कांदरपाडा भागात फटाक्यांची आतषबाजी करत या निर्णयाचे स्वागत केले.

याप्रसंगी कांदरपाडा येथून सुटणारी बस क्रमांक 245  मधील बेस्ट बसचालक, वाहक व प्रवाशांना गुलाबाचे फुल व पेढे भरवत आनंदोत्सव साजरा करण्यात आला. आज सकाळपासूनच बोरिवली-दहिसर भागात प्रवाशांनी रिक्षाकडे पाठ फिरवत बेस्ट बस थांब्यांवर गर्दी केली होती.या निर्णयामुळे मुंबईकमधील प्रवाश्यांना मोठा दिलासा मिळाला आहे.