पालिका दवाखान्यांत आहारतज्ज्ञ 

मुंबई - शहरात मधुमेह, लठ्ठपणा आदी आजार वाढत असल्याच्या पार्श्‍वभूमीवर मुंबई महापालिकेने एक महत्त्वाचा निर्णय घेतला आहे. पालिकेच्या 127 दवाखान्यांमध्ये आहारतज्ज्ञांची नियुक्ती करण्यात येणार आहे. त्याचबरोबर सर्व दवाखाने आणि उपनगरी रुग्णालयांमध्ये सर्व प्रकारच्या प्राथमिक चाचण्या होणार आहेत. "आपली चिकित्सा' योजनेअंतर्गत अशी सुविधा सुरू करण्यात येणार आहे. त्यासाठीची निविदा प्रक्रिया पूर्ण झाली आहे. पुढील 15 दिवसांत सुविधा सुरू करण्याचा पालिकेचा प्रयत्न असल्याची माहिती एका अधिकाऱ्याने दिली. 

उच्चभ्रूंमध्ये आढळणारे जीवनशैलीचे आजार काही वर्षांत अल्प उत्पन्न गटांमध्येही दिसू लागले आहे. पूर्वी कामगार वर्गाच्या वस्त्यांमध्ये लठ्ठपणा, मधुमेह आदी आजारांच्या रुग्णांचे प्रमाण दुर्मिळ होते; मात्र काही वर्षांतच अशा आजाराने ग्रस्त रुग्ण तिथे मोठ्या प्रमाणात आढळू लागले आहेत. महापालिकेच्या दवाखान्यांत प्राथमिक उपचारांसाठी येणाऱ्या रुग्णांमध्ये असे आजार आढळू लागले आहेत. पालिकेने त्याची दखल घेतली आहे. त्यासाठी 127 दवाखान्यांमध्ये कंत्राटी पद्धतीने आहारतज्ज्ञ नियुक्त करण्याचा निर्णय घेतला आहे. 

पालिकेच्या दवाखान्यांमध्ये आणि उपनगरी रुग्णालयांमध्ये अनेक प्रकारच्या रक्त चाचण्या होत नाहीत. वैद्यकीय निदानासाठी लागणाऱ्या काही प्राथमिक चाचण्याही होत नाहीत. त्यावर उपाय म्हणून खासगी संस्थांच्या मदतीने सर्व प्रकारच्या प्राथमिक चाचण्यांची सोय नागरिकांना उपलब्ध करून देण्यात येणार आहे. 

पालिकेचे दवाखाने - 175 
आहारतज्ज्ञ नियुक्त करणार - 127 
सर्व प्रकारच्या चाचण्या - 175 

दवाखान्यांमध्ये रक्ताबरोबरच इतर प्रकारच्या प्राथमिक चाचण्या करून देण्यासाठी निविदा मागविण्यात आल्या होत्या. निविदाप्रक्रिया पूर्ण झाली आहे. लवकरच चाचण्या करण्याची सुविधा सुरू करण्याचा प्रयत्न आहे. त्यामुळे आजारांचे निदान लवकर होऊन त्यानुसार उपचार वेगाने सुरू करता येतील. त्याचबरोबर कंत्राटी पद्धतीने आहारतज्ज्ञही नियुक्त करण्याचा प्रयत्न सुरू आहे. 
सुनील धामणे, उपायुक्त (वैद्यकीय) 

62 लाख 74 हजार रुग्णांचा आढावा 
पालिकेच्या डॉक्‍टरांच्या पथकाने 175 दवाखान्यांत उपचारांसाठी आलेल्या रुग्णांचा आढावा घेतला होता. सुमारे 62 लाख 74 हजार रुग्णांचा आढावा घेण्यात आला. त्यात श्‍वसन विकार, ताप, डायरिया, मधुमेह आणि अतिताणाचे रुग्ण सर्वाधिक होते.