मुंबई - ज्येष्ठ पत्रकार ज्योतिर्मय डे ऊर्फ जे. डे. यांच्या हत्येप्रकरणी पत्रकार जिग्ना व्होरा आणि स्थानिक नेता जॉन पॉल्सन जोसेफ यांना दोषमुक्त करण्याच्या विशेष मोक्का न्यायालयाच्या निर्णयाला केंद्रीय अन्वेषण विभागाने (सीबीआय) आव्हान दिले आहे. सीबीआयने उच्च न्यायालयात अपील दाखल केले असून, जोसेफ यांच्या विरोधातील अर्जावर तीन आठवड्यांनी आणि जिग्ना व्होरा यांच्या विरोधातील अर्जावर 18 मार्चला सुनावणी होईल.
जे. डे. यांच्या हत्येची पद्धत पाहता या गुन्ह्यात एखाद्या टोळीचा हात असावा, असा संशय सुरवातीपासूनच असल्याने सुरवातीला मुंबई पोलिसांच्या गुन्हे शाखेने तपास केला. त्यानंतर या प्रकरणाचा तपास सीबीआयकडे सोपवण्यात आला. व्यावसायिक भांडणातून पत्रकार जिग्ना व्होरा हिने जे.डे. यांची तक्रार कुख्यात गुन्हेगार छोटा राजन याच्याकडे केली. त्यांच्या दुचाकीचा क्रमांक आणि घराचा पत्ताही तिनेच छोटा राजनला पुरवला, जे. डे. यांच्या विरोधात छोटा राजनला भडकवण्याचे कामही तिनेच केले होते. स्थानिक नेता जॉन पॉल्सन जोसेफ याच्या मोबाईलवरून दोन वेळा तिचे छोटा राजनशी बोलणेही झाले होते, असे आरोप होते.
पुरावे देण्यात अपयश
जे. डे. यांची हत्या म्हणजे पूर्वनियोजित कट असल्याचे सरकारी पक्षाने सिद्ध केले आहे. त्यांच्या हत्येनंतर छोटा राजनने काही पत्रकारांशी संपर्क साधून गुन्ह्याची कबुली दिली होती. पत्रकारांच्या साक्षी आणि मोबाईलवरील संभाषण, तसेच छोटा राजनच्या आवाजाचे नमुने मोक्का न्यायालयाने पुरावे म्हणून ग्राह्य धरले होते. परंतु जिग्ना व्होरा आणि जोसेफ यांच्या विरोधात ठोस पुरावे सादर करण्यात सरकारी पक्षाला अपयश आल्याचे निरीक्षण नोंदवत न्या. समीर हडकर यांनी त्यांना दोषमुक्त केले होते.
|