किरण माने, सतीश राजवाडेंच्या भेटीत काय घडलं? काय म्हणाले जितेंद्र आव्हाड?

मुंबई: मुलगी झाली हो (Mulgi zali ho marathi Serial) या मालिकेतील प्रमुख कलाकार किरण माने (Kiran mane) गेल्या काही दिवसांपासून चर्चेत आहेत. राजकीय भूमिका घेतली म्हणून मालिकेतून काढल्याचा आरोप त्यांनी केला आहे. त्यानंतर या मालिकेतील काही कलाकार हे त्यांच्याविरोधात तर काही कलाकार त्यांच्यासोबत उभं राहिल्याचं दिसून आलं. आतापर्यत किरण माने (Kiran Mane) यांनी सोशल मीडियावरुन वेगवेगळ्या पोस्ट लिहून आपल्यावर त्या मालिकेतील इतर कलावंतांनी जे आरोप केले आहेत त्याचे खंडन केले आहे. स्टार प्रवाह वाहिनीने कोणतंही कारण न देता थेट मालिकेतून बाहेर काढलं आणि त्यानंतर त्यांनी उलटसुलट आरोप केल्याचा दावा किरण माने यांचा आहे. सध्या या प्रकरणामध्ये एक नवी घडामोड दिसून आली आहे.

'मुलगी झाली हो' मालिकेतून काढून टाकल्यानंतर अभिनेते किरण माने आणि स्टार प्रवाहचे कंटेंट हेड सतीश राजवाडे हे दोघेही गृहनिर्माण मंत्री जितेंद्र आव्हाड यांच्या भेटीला गेले होते. खासदार अमोल कोल्हे हे देखील या बैठकीदरम्यान उपस्थित होते.

या भेटीनंतर जितेंद्र आव्हाड यांनी आपलं मत मांडलंय. त्यांनी म्हटलंय की, किरण माने प्रकरणात स्टार प्रवाहचे सतीश राजवाडे यांच्यासोबत चर्चा केली आहे. आम्ही त्यांना विचारलं की किरण माने यांना याआधी नोटीस दिली होती का? एखाद्या कलाकाराला याप्रकारे बाहेर काढणं हे माणुसकीच्या विरोधातली घटना आहे, असं मला वाटतं.

पुढे ते म्हणाले की, सर्व स्त्री कलाकारांनी किरण माने यांची बाजू घेतली आहे. स्टार प्रवाहचे प्रॉडक्शन हाऊसचे लोक येऊन मला भेटणार आहेत. एका स्त्रीने त्यांच्यावर आरोप केला पण बाकीच्या स्त्री कलाकारांनी त्यांची बाजू घेतली आहे. तसं दिसूनही येतंय. पुढे त्यांनी प्रश्न केलाय की, प्रॉडक्शन हाऊसने त्यांना कधी सांगितले होते का? एक चांगली मालिका बंद होऊ नये, एवढीच आमची इच्छा आहे.

पुढे ते म्हणाले की, मी एकदा भूमिका घेतली त्यातून मी पाय मागे घेत नाहीय. हा वैचारिक लढा नाहीये. हा राजकीय अभिनिवेश नाहीय. किरण माने हे प्रकरण माझ्यापर्यत आले म्हणून मी त्यांची बाजू घेतली आहे, असं त्यांनी स्पष्ट केलं. एका प्रॉडक्शन हाऊस विरुद्ध महिला कलाकाराने किरण माने याची बाजू घेतली या खऱ्या जिजाऊंच्या लेकी आहेत, असं म्हणत त्यांनी किरण मानेंची बाजू घेणाऱ्या कलाकारांचं कौतुकही केलं आहे.