उन्हाळी सुटीत मध्य रेल्वेच्या 60 विशेष गाड्या
मुंबई - उन्हाळी सुटीसाठी कोकणात जाणारे प्रवासी आणि पर्यटकांच्या सोईसाठी मध्य रेल्वे 60 विशेष गाड्या चालवणार आहे. पनवेल-सावंतवाडी आणि पुणे-सावंतवाडी स्थानकांदरम्यान या रेल्वेगाड्या धावतील.
पनवेल-सावंतवाडी विशेष गाडी 6 एप्रिल ते 9 जूनदरम्यान दर शनिवार व रविवारी सकाळी 8.15 वाजता सुटून त्याच दिवशी रात्री 8 वाजता सावंतवाडीला पोचेल. सावंतवाडी-पनवेल विशेष गाडी 5 एप्रिल ते 8 जूनदरम्यान दर शुक्रवार व शनिवारी रात्री 8.30 वाजता सुटून पनवेलला दुसऱ्या दिवशी सकाळी 7.20 वाजता पोचेल. या विशेष रेल्वेगाडीच्या एकूण 40 फेऱ्या होणार असून, रोहा, माणगाव, खेड, चिपळूण, सावर्डे, संगमेश्वर, रत्नागिरी, अडवली, वलिवडे, राजापूर रोड, वैभववाडी, कणकवली, सिंधुदुर्ग आणि कुडाळ या स्थानकांत थांबा देण्यात आला आहे.
पुणे-सावंतवाडी विशेष गाडी 5 एप्रिल ते 7 जूनदरम्यान दर शुक्रवारी पहाटे 4.55 वाजता सुटून त्याच रात्री 8 वाजता सावंतवाडीत दाखल होईल. सावंतवाडी-पुणे विशेष गाडी 7 एप्रिल ते 9 जूनदरम्यान दर रविवारी रात्री 8.30 वाजता सुटून पुण्यात दुसऱ्या दिवशी दुपारी 12.25 वाजता दाखल होईल. एकूण 20 फेऱ्या होणाऱ्या या विशेष रेल्वेगाडील लोणावळा, पनवेल, रोहा, माणगाव, खेड, चिपळूण, सावर्डे, संगमेश्वर, रत्नागिरी, अडवली, वलिवडे, राजापूर रोड, वैभववाडी, कणकवली, सिंधुदुर्ग आणि कुडाळ या स्थानकांत थांबा देण्यात आला आहे.
सोमवारपासून आरक्षण
या दोन्ही विशेष रेल्वेगाड्यांना एसी चेअर कारचे दोन, द्वितीय श्रेणी आसनव्यवस्था असलेले 11 डबे जोडले जातील. या विशेष गाड्यांचे आरक्षण 25 मार्चपासून आयआरसीटीसीच्या संकेतस्थळावर सुरू होणार आहे.
|