मुंबईत १५ कोटींचे द्रवरूप कोकेन जप्त

सकाळ वृत्तसेवा
रविवार, 21 जुलै 2019

मुंबईतील छत्रपती शिवाजी महाराज विमानतळावरून साडेपाच किलो द्रवरूप कोकेनसह दोन परदेशी महिलांना अटक करण्यात आली.

मुंबई - मुंबईतील छत्रपती शिवाजी महाराज विमानतळावरून साडेपाच किलो द्रवरूप कोकेनसह दोन परदेशी महिलांना अटक करण्यात आली. या उच्च प्रतीच्या कोकेनची किंमत १५ कोटी रुपयांपेक्षा जास्त आहे. द्रवरूप कोकेनमध्ये भेसळ करून ५० किलोपेक्षा जास्त कोकेनची भुकटी बनवली जाऊ शकते. या प्रकरणाचे धागेदोरे आंतरराष्ट्रीय ड्रग माफियांपर्यंत पोहोचल्याचे सांगण्यात आले.

मेरेलेस गार्सिया युरिंका इलिमार (३१, वेनेझुएला) व हाड्री वेनेस्का विनहास कोस्टा (२१, ब्राझील) असे अटक करण्यात आलेल्या परदेशी महिलांची नावे आहेत. विमानतळावरील ग्रीन कॉरिडॉरपर्यंत आल्यावर त्यांना ताब्यात घेण्यात आले. मेरेलेसकडे तीन किलो १८० ग्रॅम आणि हाड्रीकडे दोन किलो १९० ग्रॅम उच्च प्रतीचे द्रवरूप कोकेन सापडले. या तस्करीचे धागेदोरे दक्षिण अमेरिकेतील अमली पदार्थ माफियांपर्यंत पोहोचले आहेत, अशी माहिती एका वरिष्ठ अधिकाऱ्याने दिली. 

उच्च प्रतीच्या कोकेनमध्ये भेसळ करून बनवलेली भुकटी किरकोळ बाजारात विकली जाते. ही प्रक्रिया सोपी असल्यामुळे कोकेनला जागतिक बाजारपेठेत मोठी मागणी आहे. या परदेशी महिलांकडून जप्त करण्यात आलेल्या द्रवरूप कोकेनपासून ५० किलोपेक्षा जास्त भेसळयुक्त कोकेन बनवले जाऊ शकते. त्यानंतर त्याची किंमत अब्जावधी रुपयांवर जाते. 

द्रवरूप कोकेन अधिक घातक
द्रवरूप कोकेनची खाण्याच्या पदार्थांमधून तस्करी केली जाते. अमेरिकेत ही कार्यपद्धती फार पूर्वीपासून सुरू असून आता भारतातही सुरुवात झाली आहे. या द्रवरूप कोकेनचे पावडरमध्ये रूपांतर केले जाते आणि समाजमाध्यमांवरून ऑर्डर घेतल्या जातात. संशय येऊ नये, यासाठी तस्करीत विशेष करून महिलांचा वापर केला जातो. 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Liquid cocaine worth 15 crore seized at Mumbai