कल्याण-अहमदनगर महामार्गावर अपघात

सरळगाव (ठाणे) : कल्याण-अहमदनगर या राष्ट्रीय महामार्गावर बापसई गावाजवळ बोलेरो व भाजीपाला वाहतूक करणारी पिक अप यांच्यात झालेल्या अपघातात 1 ठार तर 12 जण गंभीर जखमी झाले आहेत. सर्व प्रवासी मुरबाड-सरळगाव येथील असल्याची माहीती मिळाली. 

घटनेची मिळालेली माहीती अशी की सरळगाव येथून एका कंपनीच्या कामासाठी बोलेरो जीप रोज कल्याण येथे जाते. या जीप मधून हे सर्व प्रवासी प्रवास करीत होते. सकाळी नेहमीप्रमाणे बोलेरो जीप प्रवासी घेऊन कल्याणकडे जात होती. याच वेळी मुरबाड तालुक्यातील धसई येथील भाजीपाला वाहतूक करणारी पिकअप कल्याण कडून मुरबाडकडे येत होती. या दोन्ही वाहनांची कल्याण-अहमदनगर या राष्ट्रीय महामार्गावरील बापसई गावा जवळ समोरा-समोर धडक झाली. या धडकेत प्रदिपकुमार जियालाल सरोज (मुरबाड) हे जागेवर ठार झाले, तर बोलेरो गाडीतून प्रवास करणारे भालचंद्र माळी, नामदेव व्यापारी, महेश घूडे, दिपक घोडे, राजेश पवार, जियाराम सरोज, सचिन बांगर व पष्टे हे गंभीर जखमी झाले आहेत. या सर्व जखमींना तातडीने उपचारासाठी नेण्यात आले. बोलेरोचा जखमी चालक रिशांत धनगर हा गोवेली येथील रूग्णालयात उपचार घेत आहे. तर पिकअपचा चालक मात्र जखमी अवस्थेत पळून गेला आहे.