Mumbai:विजेच्या धक्क्याने 12 वर्षीय मुलगा जखमी;कल्याण मधील घटना
डोंबिवली - सार्वजनिक शौचालयाच्या टेरेसला लागून असलेल्या ट्रान्सफॉर्मरच्या वायरचा झटका बसल्याने 12 वर्षीय मुलगा गंभीररित्या भाजल्याची घटना कल्याण पूर्वेतील चक्की नाका परिसरात घडली आहे. सोनू राम असे जखमी मुलाचे नाव असून त्याच्यावर खासगी रुग्णालयात उपचार सुरु आहेत.
कल्याण पूर्वेतील चक्कीनाका परिसरात सार्वजनिक शौचालय आहे. या शौचालयाचे देखभालीचे काम कंत्राटी पद्धतीने मेघनाथ राम यांच्याकडे देण्यात आले आहे. त्यामुळे ते त्यांच्या कुटुंबासह शौचालयाच्या टेरेसवर रहाण्यास होते.
शौचालयाला लागून विजेचा ट्रान्सफॉर्मर असून त्याची वायर ही शौचालयाच्या टेरेसला लागून आहेत. रविवारी दुपारी मेघनाथ यांचा मुलगा सोनू हा टेरेसवर खेळत होता. यावेळी त्याला विजेच्या वायरचा जोरात झटका बसला.
या दुर्घटनेत तो गंभीर भाजला आहे. त्याला उपचारासाठी प्रथम केडीएमसीच्या रुक्मिणीबाई रुग्णालयात हलविण्यात आले होते. मात्र त्याची प्रकृती गंभीर असल्याने त्याला डोंबिवलीतील खासगी रुग्णालयात हलविण्यात आले आहे.
ट्रान्सफार्मरला लागूनच पालिकेने शौचालय उभारले आहे. सोनू याच्या अपघातानंतर भविष्यातही अशा दुर्घटना येथे घडू शकतात. त्यामुळे पालिकेने अशा ठिकाणी शौचालय उभारलेच कसे असा सवाल उपस्थित केला जात आहे.
हे ही वाचा
