माथेरान मिनी ट्रेनच्या अडचणी वाढल्या

माथेरान (मुंबई)- एकीकडे मिनीट्रेन सुरु करण्याच्या रेल्वे प्रशासनाच्या हालचाली सुरु असताना अनेक कारणांनी याला ब्रेक लागत आहे. मुसळधार पावसात माथेरान मिनी ट्रेनच्या मार्गात दरडी कोसळल्याने मिनी ट्रेनच्या मार्गात अडचणी निर्माण झाल्या आहेत.

वर्ष भरापासून बंद असलेली मिनी ट्रेन पुन्हा सुरु करावी यासाठी चारी बाजूनी दबाव वाढत असताना कधी इंजिनामधील त्रुटींमुळे तर कधी डब्यांमुळे मिनीट्रेन सुरु होऊ शकली. मिनीट्रेन पुन्हा सुरु करण्याच्या दृष्टीने तांत्रिक दोष दूर करण्याचे प्रयत्न असताना आता निसर्गाने देखील अडचणी उभी केली आहेत. बुधवारी (ता. 28) माथेरान मध्ये जोरदार पाऊस झाला. चोवीस तासात 226 मिलीमीटर पावसाची नोंद झाली. आतापर्यंत 942 मिलीमीटर पाऊस माथेरानमध्ये पडला आहे. या मुसळधार पावसामुळे अमन लॉज स्थानक ते वॉटर पाईप स्थानक दरम्यान 143 ते 181 पॉईंट क्रमांका दरम्यान रेल्वे रुळावर दरडी कोसळल्या आहेत. अनेक ठिकाणी रुळावर माती वाहून आली आहे. यामुळे मिनी ट्रेनच्या मार्गात अडचणी निर्माण झाल्या आहेत.