मंत्रालयात झळकली 'मुख्यमंत्री उद्धव बाळासाहेब ठाकरे' पाटी

मुंबई : शिवसेना पक्षप्रमुख उद्धव ठाकरे यांनी काल (ता. 28) मुख्यमंत्रीपदाची शपथ घेतली. आज दुपारी 1 वाजता ते मुख्यमंत्रीपदाची सर्व सूत्रे स्विकारतील. यापूर्वी मंत्रालयातील मुख्यमंत्र्यांच्या सचिवालय सजविण्यात आले आहे. तर सचिवालयाबाहेर त्यांच्या नावाची पाटीही झळकली आहे.

'सकाळ'चे मोबाईल ऍप डाऊनलोड करा

उद्धव ठाकरे यांचा मुख्यमंत्री म्हणून कार्यभार स्विकारण्याचा आज पहिला दिवस असल्याने मंत्रालयात उत्साह आहे. सचिवालयाबाहेर 'उद्धव बाळासाहेब ठाकरे, मुख्यमंत्री' अशा नावाची पाटीही झळकली आहे. सचिवालयाचे प्रवेशद्वार फुलांनी सजविण्यात आले आहे. त्यामुळे उद्धव ठाकरेंचा मुख्यमंत्री म्हणून पहिला दिवस कसा जातो याकडे संपूर्ण महाराष्ट्राचे लक्ष लागले आहे.

'ठाकरे'शाही

काल 'मी उद्घव बाळासाहेब ठाकरे, ईश्‍वरसाक्ष शपथ घेतो की...' हा आवाज शिवाजी पार्कवर घुमताच उपस्थित हजारो शिवसैनिकांनी एकच जल्लोष केला होता. राज्यभरातील शिवसैनिक ज्या क्षणाची आतुरतेने वाट पाहत होते, तो क्षण आज वीस वर्षांनंतर प्रत्यक्षात आला. आकाशातील सूर्य मावळतीला जात असताना शिवसेनेचा सत्तासूर्य उगवला. राज्य आणि देशभरातील दिग्गज नेत्यांच्या उपस्थितीमध्ये शिवसेना पक्षप्रमुख उद्धव ठाकरे यांनी आज मुख्यमंत्रिपदाची शपथ घेतली. त्यांच्या रूपाने ठाकरे घराण्यातील पहिलीच व्यक्ती मुख्यमंत्रिपदी विराजमान झाली आहे. उद्धव यांच्यासह अन्य सहा नेत्यांचा शपथविधीही या वेळी पार पडला.