नवी मुंबई महापालिकेला पान टपऱ्यांवरील कारवाईचा विसर

नवी मुंबई : शहरात हॉटेल, रेस्टॉरेन्ट आणि विविध मोक्‍यावरच्या चौका-चौकांत थाटलेल्या पानटपरी चालकांवर अन्न व औषध प्रशासनातर्फे दाखवल्या जात असलेल्या कृपादृष्टीमुळे पानटपरी चालकांचे चांगलेच फावले आहे. अन्न व औषध प्रशासन विभागाच्या परिपत्रकामुळे काही दिवसांपूर्वीच पालिकेतर्फे विभाग अधिकाऱ्यांनी टपऱ्यांवर कारवाई करण्यास सुरुवात केली होती. मात्र, देखाव्यापुरती कारवाई संपल्यानंतर अनेक हॉटेल व रेस्टॉरेन्टबाहेर पानटपऱ्या सुरू असल्याचे दृश्‍य नजरसे पडत आहे. काही ठिकाणी तर खुले बारदेखील टाकले आहेत.  

अन्न सुरक्षा आयुक्त, अन्न व औषध प्रशासनातर्फे जानेवारी २०१८ ला अन्न सुरक्षा व मानके कायदा २००६ चे कलम १८ नुसार मानवी जीवनाच्या आरोग्यासाठी व ग्राहकांच्या हितांच्या सुरक्षिततेसाठी आवश्‍यक ती उपाययोजना करण्याची केंद्र सरकार, राज्य सरकार व अन्न सुरक्षा प्राधिकरण यांची जबाबदारी असणारे एक परिपत्रक काढण्यात आले होते. शहरातील छोट्या पान दुकानात तंबाखूसोबत टॉफीज, चॉकलेट्‌स, चिप्स, बिस्कीट, शीतपेय आदी पदार्थांची विक्री केली जाते. बहुतांश पानटपऱ्या या हॉटेल्स व रेस्टॉरेन्टच्या बाहेरील जागेवर थाटलेल्या आहेत. 

हॉटेलमध्ये जेवायला येणाऱ्या कुटुंबांमध्ये अनेकदा लहान मुले असतात. ही लहान मुले त्या पानटपऱ्यांवर इतर पदार्थ आणायला जाताना तंबाखूजन्य वस्तू घेण्याची शक्‍यता अन्न व औषध प्रशासनातर्फे वर्तवण्यात आली आहे. त्यामुळे शहरातील अशा पानटपऱ्यांवर कारवाई करण्याच्या सूचना सर्व स्थानिक स्वराज्य संस्थांना देण्यात आल्या होत्या. त्यानुसार घणसोली, ऐरोली व वाशीमध्ये काही पानटपऱ्यांवर विभाग अधिकाऱ्यांनी कारवाई केल्या होत्या; परंतु सीबीडी-बेलापूर, नेरूळ, सीवूडस्‌, सानपाडा व जुईनगर आदी भागांत अद्यापही राजरोसपणे हॉटेलांबाहेर पानटपऱ्यांनी थाटलेला संसार सुरू आहे. या टपऱ्या सुरू असल्यामुळे अन्न व औषध प्रशासन विभागाच्या परिपत्रकालाच हरताळ फासला जात आहे. याबाबत अन्न व औषध प्रशासन विभागाचे सहआयुक्त शिवाजी देसाई यांच्याशी संपर्क होऊ शकला नाही.

मोकळ्या जागेत बारचे पेव 
हॉटेल्स व रेस्टॉरेन्ट यांना परवाना देताना बाहेरील जागा मोकळ्या ठेवण्याची तरतूद पालिकेने आखली आहे; परंतु काही हॉटेलचालक स्वतःच भाडे घेऊन पानटपऱ्यांना परवानगी देत आहेत. त्यामुळे महापालिकेला परवाना माध्यमातून मिळणाऱ्या महसुलावर गदा येत आहे. सीबीडी, ऐरोली, घणसोली व कोपरखैरणे भागांत काही हॉटेलचालकांनी बाहेरील मोकळ्या जागेत टेबल टाकून उघड्यावर मद्यपींना बसून मद्यप्राशन केले जात असल्याचे निदर्शनास येत आहे.