भिवंडीतील अनधिकृत डाईंगवर कारवाईचे आदेश

भिवंडी : कापडावर प्रक्रिया करणाऱ्या डाईंग-सायझिंग कंपन्या दिवसरात्र विषारी वायू हवेत सोडत असल्याने भिवंडी शहरातील प्रदूषणात वाढ झाली आहे. नागरिकांची या जीवघेण्या प्रदूषणातून मुक्तता करण्यासाठी येथील नागरिकांनी प्रदूषण नियंत्रण महामंडळ व उपविभागीय अधिकारी यांच्याकडे लेखी तक्रार केल्या होत्या. या तक्रारींची दाखल घेत भिवंडी प्रांत अधिकारी डॉ. मोहन नळदकर यांनी भिवंडीतील शेलार-खोणी परिसरातील 15 अनधिकृत डाईंग-सायझिंगवर कारवाई करण्याचे निर्देश प्रदूषण नियंत्रण मंडळास दिले आहेत. 

भिवंडी तालुक्‍यातील खोणी व शेलार या ग्रामपंचायत हद्दीत खेमिसती डाईंग प्रोसेसर, शिवकृपा सिंथेटिक, शिवओम इंटरप्रायझेस, जे. जे. फॅब्रिक, जय अंबे प्रोसेसर, सनविन इंडस्ट्री, इनव्हिल कन्सल्टंट व ट्रेडस, श्रद्धा यार्न डाईंग, शत्रुंजय डाईंग, सिलिकॉन सिंथेटिक व कॉटन डाईंग, वालचंद यार्न इंडस्ट्रीज, इसटेस पोलिकोट, संतोष प्रोसेसर, मारूअर रासी मॅन्युफॅक्‍चरिंग, त्रिशूल डाईंग प्रोसेसर अशा एकूण 15 डाईंग व सायझिंग कंपन्यांवर कारवाई करण्याचे निर्देश डॉ. नळदकर यांनी प्रदूषण नियंत्रण मंडळाला दिले आहेत.

या कारवाईचा तपशील 30 दिवसांत सादर करावा लागणार आहे. दरम्यान, कारवाई निर्देशामुळे अनधिकृत डाईंग-सायझिंग मालकांचे धाबे दणाणले असून राजकीय दबावतंत्र वापरून ही कारवाई थांबविण्याचे प्रयत्न सुरू झाले आहेत.